UZOHLALA ezitokisini okungenani isonto lonke udokotela nosomabhizinisi waKwaZulu-Natal osolwa ngokukhwabanisa okuhlobene nethenda yomtholampilo ongumahamba nendlwana. OKlebe babophe uNandi Msimang eSandton ngeSonto.
UMsimang uvele okokuqala eNkantolo Yamacala Ezohwebo yaseThekwini ngoLwesibili.
Inkampani kaMsimang, iMzansi Life Care, itholakale inikeze ngomgunyathi abezempilo eKZN ithenda ka-R32 million yemitholampilo engomahambanendlwana emine ngo-2016.
Okhulumela oKlebe eKZN, uMnuz Simphiwe Mhlongo, uthi babhaliswe ngaphansi kwenkampani esikhundleni somnyango.
“Inkontileka ikhishwe ngaphandle kokulandela imigudu efanele yokuphatha i-supply chain.”
UMhlongo uthi izitifiketi zokuba semgwaqweni azitholwanga wuMnyango, izimoto zahlala iminyaka emithathu zingasetshenziswa.
Uthi uMsimang wagcina ngokuwadayisa ngomgunyathi.
NgoMeyi nyakenye oKlebe bacela usizo kumalungu omphakathi ngokuthi ukuphi uMsimang.
Inkantolo yakhipha incwadi egunyaza ukuboshwa kwakhe.
UMsimang ugcinwe esitokisini icala lahlehliselwa uJulayi 17 ukuze afake isicelo sebheyili.
Ababili ababengabasebenzi bomnyango abathintekayo kulolu daba bazoqulwa ngo-Okthoba.