Uthembisa into yamehlo umsunguli womcimbi kamaskandi i-150 maskandi Festival kulonyaka.
UMnmzane Sihle Cindi ongumsunguli nomhleli walomcimbi waminyaka yonke obanjelwa edolobheni laseMnambithi uthi izinhlelo zalonyaka zalomcimbi zihamba kahle kakhulu futhi ufuna ukubonisa abalandeli bakamaskandi into abangakaze bayibone.
UCindi ozifikile mathupha emahhovisi o-Uthukela News Times uthi bakulungele ukusingatha abathandi bomculo kamaskandi kuloMgqibelo esiya kuwo, “yonke into seyimi ngomumo. Sawabona amaphutha enzeka emcimbini wangonyaka owedlule futhi siyawalungisile kulonyaka. Ezokuphepha zobe ziqinile, kuzobe kukhona amaphoyisa, inkampani yonogada kanye nezigansonso ezizoqapha osaziwayo nabaculi,” kuchaza uCindi.
Ebuzwa mayelana nokuthi umcimbi uzophela sikhathi sini, uCindi uthe bafuna ukuthi lomcimbi uze uphele ekuseni, “sifuna abaculi badlale kuze kuse kulokhu. inkinga esabhekana nayo ngonyaka owedlule umcimbi uphela ebusuku ukuthi iningi labantu alibanga nazo izinto zokuhamba okwadala ukuthi kube khona abayizisulu zobugebengu edolobheni. Kulokhu sinabaculi abenele ukuthi badlale ubusuku bonke. sinabaculi abangu – 20 abakhulu, siphinde sibe nabaculi abangu – 20 bendawo nabasafufusa,” kwenaba uCindi.
Kulomcimbi ozoba ngoMgqibelo mhla ka 28 kuMandulo enkundleni yezidlalo iSettlers Park kulindeleke izingwazi zabaculu ezifana noMthandeni, uKhuzani, uMenzi, uGatsheni nabanye abaningi.
Amathikithi asatholakala eSpar ngo R100 amathikithi ajwayelekile kanti ngu-R250 awomacaphuna kusale. Amasango avulwa ngo 9 ekuseni.