Amaphoyisa aphume umkhankaso endaweni yase-Esdakeni emsinga, nalapho kuboshwe khona owesifazane oneminyaka engu-25 ubudala.
Amaphoyisa abophe owesifazane waseMsinga otholwe nesibhamu i-AK-47, isibhamu nezinhlamvu ezingu-105 okungekho emthethweni. Umsolwa uboshwe ngoLwesine olwedlule njengengxenye yeNational Intervention Operation Deployment, esetshenziswa njengenye yezindlela zokunciphisa ubugebengu endaweni.
“Ingxenye yalo mzamo wukushaqa zonke izibhamu ezingekho emthethweni endaweni,” kusho okhulumela iSAPS uConstable Siyabonga Nkwanyana.
Ugcinwe esiteshini samaphoyisa eMsinga kanti uzovela eNkantolo yeMantshi yaseMsinga.