KUBOSHWE unogada wasoLundi enyakatho yeKwaZulu-Natal ngezinsolo zokweba ikhasimende u-R209 500.
Umsolwa, 33, bekumele ayifake le mali ngemuva kokuyilanda kusomabhizinisi wasoLundi ngoLwesine olwedlule, kodwa ayizange ifakwe.
Okhulumela oKlebe eKZN, uCaptain Simphiwe Mhlongo, uthe kubizwe ithimba lophiko oluphenya ngobugebengu obuhleliwe eRichards Bay ukuze libhekane naleli cala.
UMhlongo uthe umsolwa waqoqa imali engu-R209 500 ngomhlaka-11 Ephreli ekhasimendeni lasoLundi kodwa akazange ayise ebhange lemali.
“Ikhasimende libuze ngemali kwase kwenziwa uphenyo lwangaphakathi,” kusho uMhlongo.
“Uphenyo luveze ukuthi incwajana yamarisidi yaxikizwa kanti necala lokweba labikwa esiteshini samaphoyisa eRichards Bay.”
UMhlongo uthe kubikelwe oKlebe base bekhomba umsolwa.
“Ngesikhathi kwenziwa uphenyo lapho kuhlala khona umsolwa, kutholakale u-R26 000. Uboshiwe wabekwa icala ngokufanele. Kulindeleke ukuthi avele eNkantolo yeMantshi yaseRichards Bay,” kusho uMhlongo.