Owayengumdlali wasemuva weKaizer Chiefs uSiyabonga Ngezana usenqobe isicoco sakhe sesibili eRomania ngemuva kokuba iFCSB idle isicoco seSuper Cup.
UNgezana, 26, wasiza iFCSB ukuthi inqobe isicoco sayo sokuqala seSuperliga ezinyangeni eziyisishiyagalolunye ejoyine leli qembu esuka kuChiefs. Udlale imidlalo engu-31 eqenjini lakhe elisha emkhankasweni wokugcina waze waqokwa naseqenjini elisemthethweni leTeam of the Season.
NgoLwesine, iFCSB kaNgezana idlale noCovinul Hunedoara kuSuper Cup yabahlula ngo 3-0 wamagoli kaDavid Miculescu, Marius Stefanescu noLuis Phelipe.
UNgezana uqale umdlalo wangoLwesine ebhentshini, kodwa wadlala imizuzu engu-15 yokugcina, njengoba iFCSB nayo ilungiselela umzuliswano wokuqala wokuhlungela i-UEFA Champions League neVirtus mhla ziyisi-9 kuJulayi.
Baqala umkhankaso wabo omusha weSuperliga ngomhlaka-13 Julayi bebhekene ne-U. Cluj.