NAMUHLA umsakazo omkhulu kunayo yonke kuleli lengabadi ngabalaleli Ukhozi FM lumemezele uhlu lwezinhlelo zalo zonyaka ka 2025/2026. Lokhu kuhlale kungundabamlonyeni kubalaleli balomsakazo ngoba basuke befuna ukwazi ukuthi izinhlelo zabo abazithandayo zansuku zonke zisuke zizoma kanjani kulonyaka.
Iba nkulu ke inkulumo-mpikiswano ezinkundleni zokuxhumana nalapho kuhlangana khona abantu ngokuthi yiluphi uhlelo oluzoshayelwa ngubani, nokuthi yimuphi umsakazi ozothola uhlelo olusha njalo njalo. Nakulonyaka lomsakazo wenze njengenjwayelo wamemezela izinhlelo zawo ezintsha. Abantu ke banemibono eyehlukahlekene njengoba bekulindelwe, kodwa abaphathi sebenqumile akusekho ukujikela emva kwendlu.
Njengoba kuyisikhathi esibalulekile nesiyintokozo lesi kubalaleli balomsakazo, akuvamile ukuba njalo kubasakazi beziteshi zomsakazo yemphakathi, ikakhulukazi lena esakaza ngolwimi lweSiZulu. iningi labo lisuke linethemba lokuthi kungenzeka bathole ithuba lokuba ngomunye wabasakazi balesi siteshi esihamba phambili kuleli. Onkabi laba basuke bethumele amaDemo abo nezicelo zokuba yingxenye yalomsakazo. Abanye ubabona ezinkundleni zokuxhumana besakaza bukhoma bezama ukuheha iso labaphathi balomsakazo. Okuqaphelekile kulonyaka neminye iminyaka eyedlule ukuthi Ukhozi alithathanga ngisho oyedwa umsakazi eziteshini zomphakathi, kunalokho bancame ukubuyisa abasakazi babo abadala abafana noVusizwe langa noSthandwa Nzuza.
Mhlawumbe sekuyisikhathi sokuthi abaphathi beziteshi zemisakazi yomphakathi benze lezi ziteshi zibe yindawo lapho abasakazi bezosebenza khona, bahole imali engakwazi ukubaphilisa ngaphandle kokulangazelela ukuya emisakazweni emikhulukazi njengoKhozi. Baningi kabi abasakazi abanamathalente ayisimanga eziteshini zemisakazo yomphakathi, iningi labo lize lidikibale ngenxa yokungafezeki kwephupho labo lokugcina bengene emisakazweni emikhulu. Yonke lento idalwa yileli gama loku, “volontiya” elisetshenziswa eziteshini zemisakazo.
Lento yokuvolontiya eziteshini zomphakathi kumele iphele nya ngoba iningi lalemisakazo lingakwazi ukukhokhela abasakazi balo ngendlela efanele, futhi engabenza bazizwe ukuthi bayasebenza hhayi “ukuvolontiya”. Zikhona iziteshi esezikukhombisile ukuthi lento yoku,”volontiya” emisakazweni isiphelelwe yisikhathi, futhi imisakazo yomphakathi iyakwazi ukuba yibhizinisi elingenisa imali ikhokhele nabasebenzi ngokwanele. Imisakazo efana noJozi FM, iBush Radio, Izwi Lomzansi neminye isibonisile ukuthi uma ngempela lemisakazo iphethwe ngendlela efanele, iyakwazi ukugaya imali eyanele ukuthi iholele abasakazi ngendlela efanele. Kuyihlazo ukuthi emva kweminyaka engaphezu kwamashumi amathathu kwasungulwa loluhlobo lomsakazo kuleli, namanje kusemisakazo ethi yona ifuna ama “volontiya”, leyonto ichaza ngokusobala ukuthi kukhona okungahanjiswa kahle kulemisakazo.
Cabanga nje ukuthi kungaba mnandi kanjani uma kungathiwa kufika isikhathi sokushintsha izinhlelo zemisakazo yomphakathi, isasasa negidigidi libe likhulu njengoba kwenzeka makushintsha izinhlelo zokhozi. Cabanga nje umsakazi engakwazi ukusuka kwesinye isiteshi somphakathi aye kwesinye somphakathi, kusayinwe izinkontileka abantu basebenze. Angiboni ukuthi yinto enzima kangako leyo. Abaphathi bemisakazo kumele bashintshe indlela abenza ngayo nje qha, izinto zizolunga.
Ngiyafisa ukubona lapho imisakazo yomphakathi isikwazi ukuzimela, inakekele abasebenzi bayo kuze kufike lapho singekho khona isidingo esingako sokuthumela iDemo oKhozini, kodwa wazi ukuthi ungakwazi ukusuka kulesi somphakathi okuso, uye kwesinye impilo iqhubeke nempilo isimame.
Great Story!