USASHAQEKILE umndeni kaMpho Mkhumbeni (37) obesejele laseMangaung G4S, eBloemfontein, okuthiwa ubulawe wukulimalela ezandleni zezikhulu zejele.
UMkhumbeni, odonsa isigwebo sokubulala kusukela ngo-2014, ubesolwa ngokweba imali kubhakha wesikhulu ejele ngesikhathi amaphoyisa enza ukuhlola okwejwayelekile ejele. Iziboshwa zithi ushaywe ngesihluku yi-Emergency Support Team (EST) nonogada be-G4S, bamkhahlela, bamklinya, base bemfutha ngesisi esikhalisa unyembezi yize enesifo se-Asthma.
Kamuva washonela esibhedlela, udokotela ugcizelele ukuthi lomlisa ubulawe yizimo ezingezona ezemvelo, ephikisana nenkulumo yejele yokuthi ubulawe yisifuba somoya.
Umndeni kaMkhumbeni, ubikelwe ngokushona kwakhe ngoLwesithathu, waya eBloemfontein uyofuna izimpendulo kodwa wanqatshelwa ukungena ubone isidumbu sakhe. Okhulumela umndeni uBongile Mkhubeni uzwakalise ukungenami ngaso sonke lesi sehlo, ebuza ukuthi kungani izikhulu zejele zingena nemali emaselini ezikhwameni zazo nokuthi kungani iziboshwa ezabona lesi sigameko zivalelwe zodwa. Umndeni ugcizelela ukuthi ufuna kubekwe obala konke okwenzeka, ufuna ukwazi iqiniso ngokufa kwakhe.
UMnyango wezokuHlunyeleliswa kweziMilo ukuqinisekisile ukushona kukaMkhumbeni, wathi uphenyo nokuhlolwa kwesidumbu kuyaqhubeka. Kuvulwe uphenyo esiteshini samaphoyisa eBloemspruit. Lesi sigameko siveze ukukhathazeka okukhulu mayelana nokuphathwa kweziboshwa kanye nokuziphendulela kwezikhulu zejele eMangaung Correctional Centre.