Ukulalelwa kwesicelo sebheyili kwabasebenzi abayisikhombisa bakwaSouth African Social Security Agency (Sassa) nabanye abathathu kubambezeleke kuze kube u-Ephreli 1 ngoba bobabili abameli bombuso nabameli babasolwa bathi bebengakazilungiseleli ngokwanele ukuqula lelicala. Abasolwa abayishumi bafike enkantolo yemantshi eLenasia begqoke amamusk nezigqoko, befihle ubuso babo enkantolo. IMantshi uMaggie van der Merwe ibayalele ukuthi bakhiphe izifihla-buso, ichaze ukuthi isimo sobuso kanye nokubheka amehlo kubalulekile ukuze kucutshungulwe icala.
Kwababoshwe ngempelasonto abavele enkantolo kubalwa uSiphesihle Dlamini (30), Phiwe Mkhuzangwe (37), Paul Bowes (49), Keanogetswe Ledwaba (49), noPhumelele Myeza (37). Ukuboshwa kwabo kulandela icala langaphambili elithinta abanye abane okunguShumani Khwerana, Nkhensani Maluleke, Tshilidzi Ramaphosa no-Abenezer Tilahyn ababoshwa ngoFebhuwari 6 ngemuva kwezinsolo zokuthi babanjwe bekhipha izizumbulu zemali besebenzisa amakhadi akwaSassa esitolo esiseSoweto. NgoLwesibili umsolwa weshumi uPaul Bandi Myambo ujoyine leli qembu.
Okhulumela abakwaSassa, uMnuz Paseka Letsatsi, ukuqinisekisile ukuthi abasolwa abayisikhombisa bangabasebenzi bakwaSassa. Ubalule nokuthi umsolwa we-11, omunye umsebenzi wakwaSassa, usagcwele amathafa kodwa kulindeleke ukuthi aboshwe maduze. ULetsatsi ukugcizelele ukuthi uphenyo lusaqhubeka, kungase kuboshwe abanye.