Kuqubuke udweshu kumasipala wakwaNongoma enyakatho yeKwaZulu-Natal ngoLwesithathu ngesikhathi lowo owayeyimenenja kamasipala uMnuz Nhlakanipho Zulu efika emsebenzini, ephambana umyalelo wenkantolo. UZulu oxoshiwe esikhundleni ubephelezelwa onogada okuthiwa bebehlome ngezibhamu zohlobo oluphezulu, nokusshubise isimo. Kuthiwa kube nokuhilizisana phakathi konogada bakaZulu nalabo beMenenja esabambile kamasipala, uMpumelelo Mnguni, nokudale nokubambana ngezihluthu. Kuthiwa kusize ukubizwa kwamaphoyisa sezibhekene ngqo ngeziqu zamehlo. Njengendlela yokubavikela, abasebenzi bakamasipala basheshe badedelwa.
UMnguni, oqokwe njengebamba lemenenja kamasipala kulandela isinqumo senkantolo, ukugcizelele ukuthi lolu suku luqhubeke njengosuku olujwayelekile lokusebenza ngaphandle komhlangano oyisipesheli. Yize inkantolo ikuqinisekisile ukuqashwa kukaMnguni, uZulu uqhubekile nokuba yimenenja kamasipala, wasichitha isinqumo somthetho. Lokhu kubukela phansi kubukela phansi igunya lomkhandlu futhi kuphazamisa nomsebenzi owenziwayo wokusimamisa umasipala.
UNgqongqoshe wezokuBusa ngokuBambisana, uMnuz Thulasizwe Buthelezi, usigxekile isenzo sikaZulu esingekho emthethweni, wathi ukuziphatha kwakhe kuthunazE umasipala, kwamisa ukuhlinzekwa kwezidingongqangi zomphakathi. Unxuse abomthetho ukuthi bathathele izinyathelo ezifanele uZulu ngokungasihloniphi isinqumo senkantolo.