ISIHLABANI seqembu lebhola likanobhutshuzwayo lakuleli i-Orlando Pirates, uThembinkosi Lorch, sisematheni kubathandi bebhola likanobhutshuzwayo. Lokhu kulandela ukusabalala kwezindaba zokuthi angase ashiye uMabhakabhaka aye kuMamelodi Sundowns. Yize kungekho okuqinisekisiwe okwamanje, abalandeli sebevele babelana ngemicabango yabo ngaye ngokushiya iqembu lakhe – imibono yehlukahlukene.
UThembinkosi Lorch uthathwa njengomunye wabadlali bebhola abadumile kuleli – njengezihlabani eziningi – useze abe neculo elikhuluma ngamakhono akhe.
izinkulungwane zabalandeli baleliqembu zibeke ithemba kulesi sihlabani esidlalela i-Orlando Pirates njengomdlali wasesiswini ohlaselayo.
Nokho kuzovela ukuthi ikusasa lakhe eqenjini aliqinisekile.
Ekuseni namuhla kuqale ukusabalala kwemibiko yokuthi iSundowns ifuna ukusayinisa lo mdlali oneminyaka engu-30 ngaphambi kokuthi kuvalwe iwindi lokuhwebelana ngabadlali bePremier Soccer League (PSL) namuhla ebusuku.
Yize zingakaqinisekiswa lezi izindaba okwamanje kodwa abazazi kahle bathi iSundowns ifuna ukusayinisa lesi sikhwishikhwishi somdlali lingakavaleki iwindi lokusayinisa kwiPSL.