UMKHANKASO wokwamukela amalungu e-ANC awuhambanga kahle kuNobhala-Jikelele we-ANC, uMnuz Fikile Mbalula, ngesikhathi ehlangabezana nembibizane ezinkundleni zokuxhumana ngemuva kokubonakala kwemoto inikezela izikibha kubantu abebengamalungu e-Economic Freedom Fighters (EFF) ngeSonto. .
Kwi-video, ngaphandle nje kwehholo obekubanjelwe kulo umcimbi we-ANC, kubonakale imoto emhlophe engamakiwe ikhipha izikibha ezintsha ze-EFF yazinikeza abantu i-ANC abathi babuyela eqenjini.
Kuthiwa i-ANC iqashe izihlwele ukuze kube sengathi balahlai-EFF bajoyina i-ANC. Abasebenzisi abaningi benkundla yezokuxhumana bachaze lesi simo njengesenzo esikhombisa ukuphelelwa ngamacebo ngokhetho lukazwelonke lwango-2024.
Lokhu kuza ngemuva kokuthi i-EFF ixoshe amalungu eqembu alinganiselwa ku-62 ngenxa yokwehluleka ukuthenga amabhasi emgubho weminyaka eyishumi yasungulwa eFNB Stadium eGoli ngoJulayi nonyaka.
UMbalula, ubekhuluma emhlanganweni womphakathi obuseWedela, esifundeni saseMerafong obekuhloswe ngawo ukwamukela amalungu e-EFF angaphezu kuka-50 axoshwa abuyela eqenjini elibusayo.
“Asibonge amaqabane abuyile ku-ANC ephuma kuleya nhlangano elahlekile ebizwa nge-EFF. Sithi siyakwamukela ekhaya,” kusho yena. Uthe baqiniswe amandla ngamaqabane abuyela ku-ANC esuka ku-EFF.
“Siyanibonga ngoba beningaya noma kuphi nijoyine amanye amaqembu kodwa nakhetha i-ANC, sibonga kakhulu,” kusho uMbalula
Uthe i-ANC imatasatasa ngohlelo lokuzivuselela kabusha futhi ayizange iphazamiseke.
Khonamanjalo, esitatimendeni, i-EFF eGauteng ithe inkulumo kaMbalula ayizange isimangaze, yathi i-ANC emasontweni ambalwa edlule yethule umkhankaso wokukhetha okuhloswe ngawo ukudicilela phansi isithunzi se-EFF, kanye nobuholi bayo eGauteng.
“Kuyasikhathaza ukuthi ikhansela elaxoshwa yi-EFF kanye ne-ANC babambisane baqhashe iqeqebana labantu abangakaze babe ngamalungu e-EFF bawabize ngamalungu e-EFF angeneme,” kusho isitatimende.
lesi sitatimende siveze ukuthi le midlalo emincane yepolitiki yejwayelekile kwi – ANC, kanjalo nokuziphatha okungekuhle kwalowo obeyikhansela le-EFF okuholele ekuxoshweni kwalo kwasekuqaleni.
Amalungu amasha e-ANC amukelekile athe ukuhlala kwawo ku-EFF akusabekezeleleki ngoba awanawo amazwi.