AMALUNGU e-Economic Freedom Fighters eKZN asefunge agomela ukuthi azoqhubeka nemibhikisho kuMasipala waseMhlathuze kuze kube ababengamalungu awo amathathu bayakhishwa emkhandlwini.
Iqembu lithi labo ababengamalungu baxoshwa eminyakeni emibili edlule.
Amalungu aleliqembu angene ngenkani emahhovisi alo masipala ngoMsombuluko, efuna ukuthi lezi zihlalo zinikezwe abantu abasengamalungu e-EFF.
Amaphoyisa abekhona kanti kudingeke ukuthi aqhumise isisi esikhalisa unyembezi ukuhlakaza isixuku.
UNobhala we-EFF eKZN, uMnuz Nkululeko Ngubane, uthe sebezame konke ukungenelela.
“Eminyakeni emibili sixoxisana ngokuthi yini okumele yenzeke ngoba i-EFF kumele ibe namakhansela ayisithupha eMhlathuze avotelwe ngabantu baseMhlathuze, amathathu awekho,” kusho uNgubane.
“Khumbulani izinhlangano ezisebenzela amakhansela ngakho-ke uma nidicilela phansi amakhansela nisuke nizonda impilo ye-EFF, sizoyivikela ngemiphefumulo yethu.