Amaqembu aphikisayo e-KZN ayigxekile inkulumo kaNdunankulu uThami Ntuli ekhuluma ngesimo sesifundazwe, athi le nkulumo ayihlangene nezingqinamba eziningi abantu ababhekana nazo. UNtuli wethule inkulumo yakhe yokuqala eMgungundlovu ngoLwesihlanu.
USihlalo we-EFF eKZN, uMongezi Thwala, ubona sengathi ayinazo izixazululo ezibambekayo zokubhekana nezinselelo eziqhubekayo esifundazweni.
“Inkulumo eyize, – abantu bakithi badinga umnyakazo. Asikwazi ukubungaza imisebenzi engu-7 200 ye-EPWP. Kuyinhlamba kubantu baseKZN futhi asikwazi ukubungaza ukuthi uhulumeni wesifundazwe awunalo uhlelo lokulwa nenkohlakalo komasipala. Kuwuphawu olucacile lohulumeni ongenalo iplani.”
Inkosi uChiliza yoMkonto Wesizwe ithi alukho uhlelo olucacile lokubhekana nezinkinga emnyangweni wezempilo nowezemfundo.
“Abantu baseKZN abaphileli izithembiso. Bahlale betshelwa ukuthi babe nethemba, nokho imithi ayikho emitholampilo nasezibhedlela. Izikole esifundazweni zisenkingeni sitshelwa ngethemba. Azikho izixazululo ezivezwayo.”
Kodwa uFrancois Rodgers weDA uthi inkulumo kaNdunankulu ibinohlonze futhi iyisinyathelo esifanele.
“Ngicabanga ukuthi uthinte izindawo ezifanele. Yize izinselelo zezimali azivumile zinzima, sesisidlulile ikona. Asinakuncishiswa isabelomali – okokuqala ngqa eminyakeni emine kuya kwemihlanu.”