Amalungu eNgonyama Trust Board athi asengamalungu ebhodi futhi awakuboni ukumiswa okwamenyezelwa yiSilo samaZulu uMisuzulu kaZwelithini ngoDisemba.
Amalungu ebhodi abe nesithangami sabezindaba eMgungundlovu. Baphinde bakhuluma ngezinsolo ezibhekiswe kubo yilungu lebhodi uDokotela Thandiwe Dlamini kwimbizo esanda kubizwa yiNgonyama kaZulu.
UDlamini wenze izinsolo zenkohlakalo nokukhwabanisa kumalungu ebhodi amisiwe.
IPhini likaSihlalo webhodi, u-Advocate Linda Zama, uthi nguNgqongqoshe wezokuThuthukiswa kweziNdawo zaseMakhaya nokuBuyekezwa koMhlaba kuphela onamandla okubamisa noma abaxoshe.
“Akekho omunye umuntu onegunya lokuqoka leli bhodi alixoshe ngaphandle kukangqongqoshe ohleli. Ngakho-ke, sisengamalungu ebhodi, asimisiwe. Ukuthi asifunwa siyakuvuma kodwa akusibo bonke abantu abangalifuni leli bhodi kodwa ngokomthetho asimisiwe.”
UZama uthi bahlose ukuthathela uDlamini izinyathelo zomthetho.
“Impela sinalo ilungelo ngakho-ke kuthintekile abantu ukuthi bamangalele le ntokazi, futhi kuzoba lula ukuyimangalela. Lokhu ngikusho njengommeli; ukuqulwa kwamacala kuthatha isikhathi eside, kodwa kuzodingeka senze okufanele.”