Iqembu loMkhonto weSizwe (MK) lithi isiko lokuqamba amanga liholela ekutheni kuvinjwe abamele umphakathi ukuthi bakhulume ngqo nomholi walo, uJacob Zuma.
Le nhlangano isanda kuchibiyela umthethosisekelo wayo ukuze iveze ukuthi abamele umphakathi kumele basebenzise zonke izinhlelo zangaphakathi kwenhlangano ngaphambi kokuphakamisa noma yiluphi udaba kuZuma.
Ekhuluma esithangamini nabezindaba ngoMsombuluko, uNobhala Jikelele we-MK Party uFloyd Shivambu uthe kubalulekile ukuthi inhlangano ibe nohlaka olucacile lwamandla.
Uthe izindaba zokubusa kumele ziphakanyiswe ezinhlakeni ezifanele ukuze ziqoshwe phansi.
“Isiko, kwesinye isikhathi Lenziwa ngezinhloso ezinhle kodwa kwesinye isikhathi lenziwa ngezinhloso ezimbi lapho abantu bethi sizovakashela umengameli nje, sibonge bese sizethula nje, kodwa uma bekhona basuke bekhuluma ngezindaba zangaphakathi nezepolitiki zoMkhonto weSizwe kanti mhlawumbe nobuholi abasuke bekhuluma ngabo ngaleso sikhathi busuke bungekho ukuziphendulela.”