IPHINI likaMengameli we-UDM, uMnuz Nqabayomzi Kwankwa, utakuliwe ngemuva kokuthunjwa esendleleni eya esikhumulweni sezindiza saseKapa ngoLwesibili ntambama.
Ngokusho komholi weqembu uBantu Holomisa, abathumbi bafune imali engu-R10 000.
“Uphephile manje. Uthunjwe eya esikhumulweni sezindiza. Bathathe imoto nazo zonke izimpahla zakhe,” usho kanje.
“Sikwazile ukuyikhokha lemali yokumhlenga ngokushesha.”
UHolomisa uthe uNkwankwa uphephile esiteshini samaphoyisa eLingelethu eKhayelitsha, eKapa.
Ekhuluma nabezindaba, iPhini likaNobhala Jikelele weqembu uZandile Phiri uthe uNkwankwa ubesendleleni elibangise eGauteng lapho kuzogcotshwa khona uMengameli uCyril Ramaphosa eZindlini Zombuso.
“Okubuhlungu wukuthi ngeke sikhulume okuningi okwamanje usesiteshini samaphoyisa. Iqembu lakhokha isihlengo. Inhlangano izokhipha isitatimende.”
Imoto iphinde yatholakala ngosizo lwenkampani yeTracker.