BABHALE IMIBHALO EBHINQAYO ABABENGABASAKAZI BOKHOZI KUSHIYA OBENGUMPHATHI SITESHI

Kubukeka engathi baningi abajabule ngokwesula kwalowo obengumphathi siteshi womsakazo omkhulukazi kuleli Ukhozi FM okuvele izindaba zokwesula kwakhe izolo ngoLwesithathu.

Izolo, abezindaba badedele izindaba zokwesula kukaSbongi Ngcobo kulomsakazo emva komhlangano obe khona obuhlanganisa izikhulu eziphezulu kwa-SABC. UNgcobo ubehlezi esezindabeni ngenxa yezinkulumo ebezihlale njalo zimlandela. Amanye amaziko ezindaba ake abhala phambilini ngokusoleka kwakhe ngokuba nobudlelwano obujulile nabanye babasakazi balomsakazo kanti futhi kube khona labo angabathandisisi kahle. Lokhu kuza nje emva kokuba umculi kamaskandi odumile enze ivideo kuFacebook ekhalaza ngokungadlalwa kwengoma yakhe kulomsakazo kanye nakubize ngetulo lokuthi ingoma yakhe ingangeni kwezilishumi eisethubeni lokunqamula unyaka kulomsakazo, nasola khona yena uNgcobo ngokumvalela ngaphandle.

Emva nje kokuvela kwalezi zindaba abanye abasakazi nabasebenzi abake basebenza naye kulomsakazo bangene ezinkundleni zokuxhumana babhala imibhalo ebhinqayo okusolisa ukuthi ibibhekiswe kuye uNgcobo. USthandwa Nzuza owabe engumsakazi waloMsakazo naye isikhathi eside owaphelelwa ngumsebenzi kuphethe yena uNgcobo ungene kuFacebook wabhala kanje,“Karma knows everyone’s address, End” okuchaza ukuthi, okubi okwenza kwabanye, kuyokwenzeka naluwe.

Kanti kungakapheli isikhathi esingakanani lowo osanda kusula njemphathi wezinhlelo kulomsakazo uNkosikazi Pearl Maseko-Bhinqose naye ubhale amazwi abhinqayo wathi,“Kushuthi sorry ke” wase efaka upopayi omoyizelayo. uzokhumbula ukuthi abe khona amahlebezi okuthi laba bobabili bebengaboni ngaso linye besasebenza kulomsakazo.

Akuphelelanga lapho kodwa, intokazi engumdidiyeli wezinhlelo esebenza emsakazweni iGagasi FM njengamanje nayo eyahamba emsakazweni uKhozi kuphethe yena uNgcobo u-Ayanda Melansi nayo igijime yaze yamfishane yayofaka isithombe sikaPhaya obhalwe ukuthi,“you must eat it” wase ebhala ukuthi,“Ukhona yini ongatolika lesi sithombe?”

Ungcobo yena ubengakasho lutho emva kokuvela kwalezi zindaba, futhi akwaziwa ukuthi njengamanje uzolibhekisaphi njengoba esula kulengadlangadla yesiteshi nje.