Umsolwa uphuthunyiswe esibhedlela okubikwa ukuthi udutshulwe ngonogada eThekwini. Lesi sigameko senzeke ekhoneni lika-Dr Pixley KaSeme no-Stalwart Simelane enkabeni yedolobha, ngoMsombuluko ekuseni.
Okhulumela abosizo lokuqala be-ALS, uGarrith Jamieson, uthe bafice le ndoda eneminyaka eko-30 inenxeba lokudutshulwa esiswini.
“Ubesesimweni esibucayi wase ethola ukwelashwa endaweni yesigameko abe-Advanced Life Support Paramedics ngaphambi kokuba adluliselwe esibhedlela esiseduze ukuze athole ukunakekelwa okuphuthumayo abekudinga.
“Imibiko yokuqala ithi umsolwa udutshulwe ngonogada emva kwengxabano okungakacaci ukuthi idalwe yini kodwa amaphoyisa aphenya kabanzi.”