UMQEQESHI weMamelodi Sundowns uRulani Mokwena uthi ukhathazekile ngokuhluleka ukushaya amagoli kukaPeter Shalulile kulo nyaka .
UShalulile uqale lonyaka ngokugijima eqenjini lesizwe lakubo iNamibia ku-Ivory Coast Afcon nakhona uze waqeda lomqhudelwano ngaphandle kwegoli.
Ngemuva komqhudelwano, uqhubekile nokuvdlala kwiSundowns waze wagcina eshaye igoli ngephenathi bebhekene neTP Mazembe yaseDR Congo. IDowns inqobe lomdlalo weCAF Champions League ngo 1-0 eLucas Moripe Stadium ekuqaleni kwenyanga
“Ngabe nginamanga uma ngithi akungikhathazi,” kusho uMokwena izolo ekhuluma nabezindaba ngesikhathi kunesithangami sabezindaba seNedbank Cup. ISundowns izobhekana neMaritzburg United ngeSonto eLucas Moripe Stadium.
“Ngikhuluma naye kakhulu. Sikhulume namuhla (izolo). Sibe nesikhathi lapho okuningi bekugxile kwingxenye yesithathu yokugcina yeligi, kusho uMokwena.
UMokwena uthe bazoqhubeka nokumeseka aze abuyelwe yifomu yakhe yokushaya amagoli futhi uhlabeke umxhwele ngamagalelo akhe ngesikhathi semidlalo.