Unogada, uLouis Serenetra Moyo, 49, uthole udilikajele ngecala lokubulala umlingani wakhe, uThobile Grace Khoza, ngemuva kokuthola ukuthi usebenzise imali abeyibekele ilobolo. UMoyo, ongowokufika ovela eZimbabwe ongenazo izincwadi, akakwazanga ukuvula i-akhawunti yasebhange eNingizimu Afrika, ngakho wasebenzisa i-akhawunti kaKhoza ukonga iholo lakhe. Laba babehlala ndawonye kusukela ngo-2020, uMoyo ebehlose ukushada noKhoza uma lemai isphelele.
NgoMashi uMoyo wathola ukuthi uKhoza usebenzise u-R15 000 abewulondolozile. Ngesikhathi bexabana, wamhlasela esebenzisa izinto ezahlukene wagcina ngokumgwaza, wopha waze wafa. Wakhiya ikamelo wabaleka. Ezinsukwini ezintathu kamuva, isidumbu sikaKhoza satholwa umnikazi wendawo, etshelwa iphunga elibi elithaphuka ekamelweni.
UMoyo waboshwa ngokushesha, watholwa nekhadi lasebhange likaKhoza, umazisi kanye nocingo. Enkantolo, uvumile ukuthi wabulala, ethi wenziwa ukudinwa. Nokho, umshushisi uthe lomlisa wakhombisa isihluku esingenangqondo kowesifazane ongenacala okwakufanele azizwe elondekile ekhaya.
Umahluleli uDario Dosio usigxekile isenzo sikaMoyo, egcizelela ubukhulu bodlame olubhekiswe kwabesifazane eNingizimu Afrika kanye nesidingo sokujeziswa okuqinile ukuze kunqandwe amacala anjalo. Kanye nesigwebo sikadilikajele ngecala lokubulala, uMoyo uthole ezinye izinyanga eziyisithupha ngokuba sezweni ngokungemthetho.
UPhindi Mjonondwane, okhulumela iNational Prosecuting Authority, uzwakalise ukuzibophezela kwe-NPA kwezobulungiswa kwabahlukumezekile futhi wagcizelela ukubaluleka kokungenelela kusenesikhathi ukuze kunqandwe izinhlekelele ezifanayo esikhathini esizayo.