Kulelisonto ngithe ngizihambela lapha ezinkundleni zokuxhumana ngehla ngenyuka ngoba phela iDATA yinto ekhona, ngazithela kwizithombe ezingenze ngazibuza imibuzo eminingi ngezinga lezemfundo lalapha eNingizimu Africa. Lezi zithombe bezikhombisa abafundi bakwamanye amazwe ase-Afrika abasesemazingeni aphansi bekhombisa imisebenzi abayenze ngezandla zabo esikoleni. Lapha ngikhuluma ngabafundi ababukeka beseminyakeni elishumi kuya kweyishumi nesithupha. Ngiyahlawumbekisa la ngoba ibingekho imininingwane ebichaza ngeminyaka yabo. Laba bantwana bathwetshulwe bekhombisa ngalemisebenzi yabo abayenza esikoleni esibala kuyo, ukuxhunywa kukagesi, ukulinywa kwezingadi, ukwakhiwa kwezindlu ngezitini, ukubaza, ukushisela kanye nokuxhuma amapayipi amanzi nendle.
Kulendlu engiqhashe kuyo lapha edolobheni eMnambithi sike saba nenkinga kagesi ezinyangeni ezimbalwa ezedlule. Kuze kwaphela iviki lonke nje sihleli ebumnyameni ngenxa yokuthi bonke abantu ebebetholwa umastende ukuzolungisa logesi bebefike behluleke. Cishe zize zafika zabantathu izinsizwa ezifikile zakinakina kwahlanga zimuka nomoya. Kuze kwavela mveli velayo wasiluma indlebe ukuthi kunensizwa edabuka kwelika Mzilikazi eZimbabwe okuthiwa ayiwubheki ugesi. Sibe sesazisa umastende yabizwa lensizwa. Umfo wakwelikaMgabe lo uvele wawuthi qhwi qhwi kabili kathathu zaduma!
Manje lezi zithombe zibuyise umbuzo engaba nawo emva kwalesi sehlo wokuthi yini ebidala ukuthi lezi zinsizwa zakithi eziwufundele ugesi zehluleke zona bese kuthi le yokufika engingenalwazi lokuthi yagcinaphi esikoleni ifike ikwenze kubukeke kulula nje ukuwulungisa. Lezi zithombe zalabafundi zivele zawuphendula kalula lo mbuza wami. Inkinga yimfundo yethu.
Thina ngesikhathi sasifundiswa ngamxoxo nezintethe nezilwane zasemanzini esingazazi o-Amoeba noHydra, bona babefundiswa ukuthi ugesi uxhunywa kanjani, becijwa ukuthi amapayipi amanzi ahlanganiswa kanjani, befundiswa ngokubaluleka kwezolimo njalo njalo. Yingakho namhlanje kuyibona abakhonyayo ngemisebenzi yezandla eNingizimu Africa. UHulumeni wabo wathi uma uthola inkululeko wabeka eqhulwini ezemfundo, waqeda uhlelo lobandlulo olwalufakwe ngabamhophe ukuze sicindezeleke sihlezi sikhosiza kubo, wabe usuqhamuka nohlelo lwezemfundo olusha sha oluzosimamisa abantu bezwe labo. Yingakho namhlanje abantu abavela kwamanye amazwe bekwazi ukufika kuleli baphile, basebenze noma bengenamfundo etheni. Lo owethu uhulumeni ke yena wathola inkululeko wakhohlwa yimfundo. Saqhubeko safunda imfundo yomcindezeli. Yasicindezela njalo engqondweni kuze kube namhlanje kusenjalo. Sihlezi sima ezimpambanweni zemigwaqo simemeza sithi sikhululekile siqamba amanga ahlaza cwe! akukho nkululeko ngaphandle kwemfundo, imfundo yangempela hhayi loshevu esidliswa wona.
Mihla namalanga sithukwa lapha ezinkundleni zokuxhumana kuthiwa abantu baseNingizimu Africa bangamavila, abafuni ukusebenza. Size sithukwe ngisho nangabanye bosopolitiki, okuyibona engabe balungisa lesi simo. Namhlanje ngiyaqonda ukuthi kungani. Asikaze sibe yisizwe esivilaphayo nakanye! Inkinga akukho nkampani efuna umuntu okwazi ukuhlinza iselesele. Asikho nhlobo isikhangisi engake ngasibona sithi sifuna umuntu okwazi ukuhlukanisa umlenze wentethe ngokwezigaba zawo. Nakanye! Pho sithi abantu bakuleli abasebenzephi na? uma uhulumeni wethu efundisa izingane zethu imfundo engenamsoco sithi azukhule bese zisebenze ini, kuphi?
Kuningi uhulumeni angakufunda emazweni angaphandle. Hhayi kude kodwa khona la eduze komakhelwane bethu. Ngike ngabuka uhlelo lwezemfundo emazingeni aphasi amazwe ehlukahlukene ngabona ukuthi cha thina sisele kude kakhulu. EZimbabwe banezifundo ezifana nezokusikwa kwengqephu, ezolimo, ukubaza nezinye eziningi. eSomali kunezifundo zezibalo ezibandakanya ukuqala, ukusimamisa kanye nokuphathwa kwamabhizini. AmaJaphani wona anezifundo zobuchwepheshe ezaziwa ngokuthi amaRobotics, kanye nemisebenzi yezandla. ePakistan, zihamba phambili ezamakhompyutha nezamabhizinisi. Konke loku njalo kufundwa emazingeni aphansi emfundo, angikhulumi ngamanyuvesi la ngikhuluma ngo “A -ebhence.”
Kuningi engingakubala nangamanye amazwe. Umbuzo omkhulu ke uthi, yikuphi thina esingama ngakho sithi nakhu esihamba phambili ngakho ngemfundo yethu?
Ngempela uma uhulumeni wethu engashintshi ukwenza kusemanje, ikusasa lalelizwe lonke lilele ezandleni zabantu bokufika!
Kusho mina ngisho ngeDATA lami!!
NguMsuthu uGinimbi wakwaZungu