I-South African Health Products Regulatory Authority (SAHPRA) kanye nabanye abalawuli bezempilo bamiselwe ukusebenzisa izindlela zokunqanda amazinga aphezulu okusetshenziswa kwe-codeine.
Lolu hlelo luzophoqa amakhemisi, nezinye izinhlaka ezikhipha imithi, ukuthi ziqophe izinombolo zomazisi zabantu abanikezwe imithi, njenge-codeine esetshenziselwa ukukhulula izinhlungu nezinye izingxube zokukhwehlela.
Lolu hlelo luyimizamo yokulwisana namazinga aphezulu okusethsenziswa kwe-codeine, ikakhulukazi entsheni.
Abantu abasha kuleli abonakala besebenzisa iCodene kakhulu etholakala ikakhulukazi emuthini womkhuhlane. Kukholakala ukuthi iyasethsenziswa kakhulu uma kukhandwa isidakamizwa esaziwa ngokuthi yiNcika noma phecele iLean engaconsi phansi etsheni kulezi zinsuku.
“Lolu hlelo kuhloswe ngalo ukuqinisekisa ukuthi bonke abantu abanikezwa imithi ye-codeine baqoshwa phansi ohlelweni olutholakala kuwo wonke amakhemisi nakwezinye izindawo zokudayisa ukuze kunqandwe ukuthengwa kwayo ngendlela engavumelekile emakhemisi, emtholampilo nasezindaweni zodokotela,” kusho umkhulumeli we-SAHPRA uMadimetja Mashishi.
Uthe lolu hlelo luphinde luhlose ukuqinisekisa ukuthi abantu banikezwa kuphela umkhawulo osemthethweni wokusiza izifo ezahlukene okungenzeka babhekane nazo, okuhlanganisa ukukhwehlela nokwelapha izinhlungu.