I-ANC ne-DA bavumile ukuthi nakuba kunemibono ehlukene kodwa kumele bathole izinto abavumelana ngazo ukuze baqinisekise ukuthi ukuhlinzekwa kwezidingongqangi eKZN. Izigameko zakamuva kuMasipala waKwaDukuza kubikwa ukuthi zinyuse ukushuba kwesimo kuhulumeni wobumbano lwesifundazwe.
I-ANC igxeke i-DA ngokungahambisani nevoti lokungabethembi iMeya uLindile Nhaca ngesonto eledlule.
IPhini likaSihlalo we-ANC esifundazweni, uNkk Nomagugu Simelane, uthi ukungaboni ngaso linye kwabo akumele kubavimbe ekusebenziseni ngokubambisana.
“Ukungezwani phakathi kwe-ANC ne-DA kuyohlale kukhona ngoba ngokwemibono, sisezinhlangothini ezimbili ezihlukene. Kodwa lokho akusho ukuthi ngeke sikwazi ukusebenzisana.”
Ukhulume esithangamini se-ANC ebesikhuluma ngezinsuku eziyi-100 zobuholi besifundazwe eMhlanga ngoMsombuluko.
“Abaholi abakwikhabhinethi nesiShayamthetho sebevuthwe ngokwanele ukuthi baqonde ukuthi kumele sikwazi ukusebenzisana ukuze lesi sifundazwe sifezekise futhi silethe ukuhlinzekwa kwezidingo kubantu,” kwengeza uSimelane.
Khonamanjalo, uDean Macpherson weDA ubelokhu ephawula ngokuqhubekayo KwaDukuza.
“I-DA ngeke silindeleke, futhi ngeke sivume ukuthi ilungise izinkinga zangaphakathi zelinye iqembu lezepolitiki kuhulumeni wasekhaya. Lokho akuwona umsebenzi wethu noma isibopho sethu ngoba lokhu kuzoqeda ubuqotho nokuzimela kwethu njengeqembu lezepolitiki,” usho kanje.