Kufufusa isiteleka uqala nje unyaka esikhungweni semfundo ephakeme EMnambithi TVET College ekhampasini yaseZakheni.
Lesi sikhungo esisigcemeni sakwa-A Ezakheni sivamile ukuba nezingqinamba ezithinta ukubhaliswa kwabafundi njalo uma kuqala unyaka. Kulokhu ke ngathi inkinga enkulu ihamba nokwenyuswa kwemali yokubhalisa ngaphezu kuka 100%.
Ngokwencwadi ethunyelelwe leliphephandaba ngomunye wabafundi okhathazekile ithi lesi sikhungo senyuse imali yokubhalisa isuku kuR450. 00 yaya ku R1000. 00 ngaphandle kokubonisana nomkhandlu omele abafundi. Abafundi babuye bakhala ngokunqatshelwa ukubhaliswa uma ngabe uNSFAS ungakayikhokhi imali yalowo mfundi ayikweletayo eyasala ngonyaka owedlule. Lencwadi ithi abanye babafundi kudingeka ukuthi bakhokhe imali efinyelela ku 15000. 00 ngaphambi kokuthi babhalise.
Kuthiwa abaphathi bekolishi abasaphenduli nezingcingo kanye nama emails uma ngabe bethintwa umkhandlu wabafundi ucela ukuthi kuxoxiswane ngalezi zinqumo.
Abafundi sebesabize ngokungenelela kukhukhulela ngoqo wesiteleka ngoMsombuluko uma ngabe abaphathi bekolishi ababaphenduli kuze kube nguMsombuluko.
Kuze kwashaya isikhathi sokushicilela bengatholakali abaphathi bekolishi ukuziphendulela.