AMAPHOYISA aseGauteng enze intuthuko ophenyweni lwawo lokubulawa komdlali wasemuva weKaizer Chiefs, uLuke Fleurs, ngesikhathi kunesigameko sokudunwa imoto. Babophe abasolwa abayisithupha eSlovoville, eSoweto.
Imoto yalo mdlali kanobhutshuzwayo yatholwa isicwiyiwe ngoMsombuluko.
Okhulumela amaphoyisa aseGauteng uMavela Masondo uthi isihlabani esineminyaka engu-24 ubudala sidutshulwe kwantshontshwa imoto yakhe endaweni yaseHoneydew ngesonto eledlule.
“Amaphoyisa akholelwa ukuthi abasolwa bayingxenye yethimba elibhekene nokudunwa kwezimoto eGauteng, futhi kusaqhubeka ukuthungathwa kwabasolwa abaningi.
“Abasolwa ababoshiwe kulindeleke ukuba bavele eNkantolo yeMantshi yaseRoodepoort ngoLwesihlanu, 12 Ephreli.”