Isiphila ngempela isisho esisha esithi, “emva kokwesaba uNkulunkulu, saba abantu besifazane” insizwa yasezweni laseRuanda. Lensizwa ogama layo nguCallitxe Nzamwita edabuka enhla neRuanda esifundeni esaziwa nge Nothern Province endaweni yaseMusanze, isichithe iminyaka engaphezu kwamashumi amahlanu izivalele ngayodwana endlini ngenxa yokwesaba abantu besifazane.
UNzamwita uthi lokhu kwesaba amantombazane kumqale eneminyaka engu-16 njengoba ena-71 njengamanje. Akanalo ulwazi lokuthi kungani ebesaba kangaka abantu besifazane kodwa impela uvele aqhaqhazele angenwe yitwetwe uma eke wathi nhla wabona isibhuda.
Lensizwa ithi akuthi ndiki ukuthi ayikaze ibe nomuntu wesimame, futhi isanquma ukuthi izivalele ingaphumi naphandle ngoba abantu besimame bagcwele yonke indawo le. “Uthi uyaphuma endlini uzithele phezu kwabo! Mina angazi ukuthi kanti yini babe baningi kangaka!!” Kusho uNzamwuta enyipha.
Omakhelwane bayo lensizwa iningi labo elingabantu besifazane lithi selokhu kwathi nhlo lensizwa ayibafuni nokuthi ibabone. Kwala noma bezidlisa satshanyana bethi bayipha ukudla, ithatha ukudla maqede ingababheki nakubabheka ishingile ingene endlini yayo ivale thanqa, ISHUDE!
Odokotela bengqondo bathi lensizwa inesifo esibizwa ngokuthi yiGynophobia okuyisifo sokwesaba abantu besifazane. Ongoti bathi lesi sifo singadalwa yizinto ezehlukene, okungabalwa kuzo ukuhlukumezeka usemcane uhlukunyezwa yibo abesifazane.
Thina ke ngakithi eMnambithi lesi sifo sisibiza ngokuthi ubugwadi