Ngonyaka ozayo intaka ibekelwe amazolo futhi kuleli lengabadi njengoba sibheke okhethweni lukazwelonke lesishiyagalombili selokhu kwabusa umbuso wentando yeningi.
Noma selithe ukwehla igidigidi nomfutho wokuvota kuleli uma kuqhathaniswa nezinketho zokuqala zentando yeningi, kodwa izibalo zasakhombisa ukuthi likhona futhi liningi inani labakuleli elisakholelwa ekuvoteni. kulempelasonto esibuya kuyo, ikhomishana emele ukhetho kueli i-Independent Electoral Commission ivule izikhungo zayo yamema izakhamizi zakuleli ukuthi zibe ziqala zibhalisela ukuvota. Ngokombiko owethulwe yilekhomishana uveze ukuthi izinkumbi zabantu zikubhalisele ukuvota, okuwuphawu lokuthi cha baningi futhi abazovota kulonyaka ozokwethwasa.
Cha begithi ngizowugodla lombono wami ngize ngiwudedele ngonyaka ozayo emva kokhetho, kodwa ke ngabuye ngathi chabo, ngithuleleni ngoba phela iData ikhona?
Sengibe sezindaweni eziningi nabantu abehlukene abavela ezindaweni ezehlukene kuleli lakithi. Akunandaba ukuthi ngikuphi nobani futhi ongakanani, uma kuke kwavuka indaba ethinta uHulumeni wakuleli, wonke umuntu ukhombisa ukungenami ngendlela ophethe ngayo izwe. Babodwa ababuza ukuthi kanti loHulumeni usikhumbula nini singabantu, abanye bakhala ngenkohlakalo, abanye ngokubanjwa ngobhongwane kwawo, abanye babona igebe elikhulu phakathi kwawo nabantu, uma ngingaqhubeka ngibale kungaphela lona iData leli engiqhoshe ngalo. Kokho konke loku okugqamayo ukuthi abantu abeneme nhlobo indlela lohulumeni ophethe ngayo. Umbuzo engihlala ngisala nawo njalo yilona othi, uma ngempela bonke abantu bengeneme ngalohulumeni, pho ubani owuvotelayo njalo uma kunokhetho?
Yize noma seziqine kakhulu izikhalo ngoHulumeni kulezi zinsuku, kodwa sekuneminyaka abantu bekuleli bezwakalisa ukungenami ngendlela izwe eliphethwe ngayo, kodwa uma kufika ukhetho baphinde bawubuyisele emandleni futhi.
Lenkinga ngiqale ngayibona komakhelwane bethu iZimbabwe. Abantu baseZimbabwe bebekhala mihla le ngendlela uRobert Mugabe aphethe ngayo, kodwa futhi bona babuye bamvotele futhi uma kufika ukhetho. Nakhu manje ngiyibona yenzeka kuleli lengabadi.
Izinkundla zokuxhumana ke zona sezikwenze kwalula kakhulu ukukhalaza ngoHulumeni. Angazi noma kuke kwenzeke yini uyofunda ukuphawula kwabafundi uma kwenzeka kunodaba olukhuluma ngoHulumeni, iningi lemibono esuke ingaphansi kwalolodaba isuke igxeka noma igxibha noma yini eshiwo ngohHulumeni. Noma ngabe kulolodaba uHulumeni usuke enze kahle kanjani, kodwa umphakathi uyicinga uze uyithole into embi ozoyisho engeyinhle. Isibonelo nje, udaba lungakhuluma ngokwakhiwa kweSibhedlela esikhulu kwaMashu esizokwelapha umphakathi mahhala, kodwa imibono yabafundi ayincomi leso senzo esihle kodwa bakhala ngenani lemali esetshenzisiwe babuye babuze ukuthi engabe malini eyehle ngomlenze kuleyo mali.
Kubukeka engathi kumbalwa kakhulu okuhle abantu bakuleli abangakusho ngohulumeni wethu, kodwa uma kufika ukhetho bayakhohlwa yikho konke lokho baphinde bawubuyisele futhi. Ngabe abantu bakuleli balandela lesi sisho sabelungu esithi,”Better the Devil you know”?
Ngabe ngempela kukhona ukwesaba kokuthi kungenzeka sibe nezinkinga ezinkulu kunalezi esinazo uma singashintsha uHulumeni? Ngabe ngempela abantu bakuleli sebekulungele na ukuba nohulumeni omusha sha emva kweminyaka engamashumi amathathu? Ngabe Abantu bakuleli bakhathele ngempela yilohulumeni noma basuke beziqhubela usuku nje uma bekhononda?
Akwaziwa mbhantsi kujiya! Izimpendulo zizocaca kahle ngonyaka ozayo okhethweni.
Kusho mina ngisho ngeDATA lami!!
NguMsuthu uGinimbi wakwaZungu