Umkhandlu wamatekisi iSantaco uthi awuzange ugunyaze umbhikisho oholele ekutheni kuvalwe imigwaqo eminingi eThekwini eGreyville ngoLwesibili. Imizila engena neseduze kwaseDurban Station ithintekile ngesikhathi ibhasi kanye namatekisi amaningi evala imizila.
Imigwaqo ibihlanganisa uMngeni no-Old Fort Road.
Kukholakala ukuthi amalungu eDurban Station Taxi Association adinwe agane unwabu ngokungakhiphi amalayisensi okusebenza ngesikhathi uMnyango wezokuThutha eKZN.
Kume ukusebenza amabanga amade eZululand naseGoli ngoMsombuluko.
Yize kuvulwe imigwaqo kule ndawo kodwa akucaci noma imizila yamabanga amade isasebenza yini futhi.
USfiso Shangase weKZN Santaco uthi iziteleka kumele kube yisinyathelo sokugcina.
“Sisanda kuxoxisana nomnyango, besicabanga ukuthi mhlawumbe kuze kufike izolo udaba ngabe seluxazululekile ngoba ngaphakathi lokho kumele kuqhutshekwe nokusebenza, kuqhutshekwe nokuxoxisana ngakolunye uhlangothi.
“Niyaxoxisana ngapha, inkonzo iqhubeke ngaleya. Hhayi-ke ngaphandle kokuthi nithi nifinyelele kwangqingetshe, mhlawumbe uma nisebenzisa amandla ningene emgwaqeni.”
Ezinyangeni ezimbili ezedlule abe-KZN Transport baba nemihlangano eMgungundlovu neSantaco ngodaba lwamalayisensi.
Okhulumela uMnyango wezokuThutha, uNdabezinhle Sibiya, uthi zingaphezu kuka-115 izimvume ezingakaqoqwa amalungu kasoseshini.
“Ngalowo mhlangano kwavunyelwana ngokuthi abashayeli bamatekisi balande izimvume ezibalelwa ku-115 ezisekhona emnyangweni ezingalandwa.
“Bekunezimvume ezibalelwa ku-84 ebezizophelelwa yisikhathi zingakapheli izinsuku ezingamashumi ayisithupha, futhi cishe ayisishiyagalolunye izimvume bese ziphelelwe yisikhathi.”