Uyalulama esibhedlela eRichards Bay osolwa ngokubulala egadwe ngamaphoyisa ngemuva kokulimala ngesikhathi sokudubulana.
Ingxabano namaphoyisa yenzeke ngeSonto eMadlankala Esikhaleni.
Iziphathimandla zithi lo wesilisa, 52, ongowokufika, ubefunwa uthuli ngecala lokubulala elenzeka endaweni ngonyaka odlule.
Okhulumela amaphoyisa e-KZN, uRobert Netshiunda, uthe amaphoyisa athole ulwazi ngokuthi ukuphi umsolwa.
“Amaphoyisa aqoqe ezobunhloli zokuthi umsolwa ubecashe endaweni ehlala abantu eSikhaleni okuthe uma amaphoyisa engena lapho ehlala khona umsolwa oneminyaka engu-52 wadubula kaningi ebhekise emaphoyiseni.
“Amaphoyisa aziphindiselele ezama ukunqanda ingozi kanti ngesikhathi sokudubulana umsolwa wadutshulwa walimala. Alikho iphoyisa elilimale ngesikhathi sokudubulana. Umsolwa utholwe nesibhamu nezinhlamvu.”
UNetshiunda uthi uma esewumqemane umsolwa uzovela enkantolo ukuze abhekane namacala okubulala, ukuzama ukubulala amaphoyisa nokutholakala nesibhamu nezinhlamvu okungekho emthethweni.