Umsolwa oneminyaka engu-24 ubudala kulindeleke avele eNkantolo yeMantshi yaseVentersdorp ngoMsombuluko ngezinsolo zokweba i-ambulensi nesiguli esibhedlela esiseNorth West.
Ngokusho kokhulumela amaphoyisa uCol Adéle Myburgh, umsolwa uboshwe ezintatha zangoLwesihlanu eTshing Location, ngaphandle nje kwaseVentersdorp.
“Lo mlisa ubanjwe ngemuva kwesigameko okusolwa ukuthi i-ambulensi yebiwe phambi kwesibhedlela sendawo ngoLwesine ngezithuba zabo-11 ebusuku. Kuthiwa abasebenzi be-Emergency and Medical Rescue Services (EMRS) bebelethe lesi siguli esibhedlela, kuthe besematasatasa benza imicikilisho yokunikezela ngesiguli esibhedlela, umsolwa ungene e-ambulensini maqede washaya wachitha nesiguli,” kusho uMyburgh.
Uthe amaphoyisa athintwa athatha isinyathelo ngokushesha, akwazi ukuthola umkhondo nokumisa i-ambulensi ngemuva kwesigameko eTshing, Extension 5.
Isiguli asilimalanga ngalesi sigameko.
UMyburgh uthe umsolwa ubhekene necala lokweba imoto.
Ibamba likaKhomishana wamaphoyisa eNyakatho Ntshonalanga u-Maj-Gen Patrick Asaneng uncome amaphoyisa ngesinyathelo esisheshayo esiholele ekuboshweni kwe-ambulensi nesiguli.