Ikomidi lezempilo ePhalamende liKwaZulu-Natal ukuzolalela imibono yezakhamizi, ikakhulukazi intsha, mayelana nesiphakamiso semithetho kagwayi. Libhekise amabombo eGreenwood Park eThekwini ngeSonto ekuseni.
“Kulabo abeseka lo mthethosivivinywa, bathi empeleni unomthelela othile esimweni sempilo. Bayakwamukela ukuthi umthethosivivinywa awukona ukuvala ugwayi ngokuphelele kodwa owokulawula futhi ube nezinyathelo nemithetho, ikakhulukazi ngokufaka umoya,” kusho usihlalo wekomidi. Dr Sibongiseni Dhlomo.
Leli komiti libambe izigcawu zokulalelwa kwezimvo zomphakathi ezindaweni eziningi okubalwa kuzo eRichards Bay naseMgungundlovu.
Umthethosivivinywa uhlose ukulawula ukuthengiswa, ukukhangisa, ukusetshenziswa kwemikhiqizo kagwayi.
NgoMgqibelo ikomiti lihlangane nomphakathi waseMbali kuWadi 15 ehholo lendawo.
UDhlomo uthi ngemuva kokuxoxisana nomphakathi bazocubungula izethulo ezenziwe izinhlangano ezahlukene.
“Ngibona sengathi kuzoba matasa ngoFebhuwari nangoNdasa, ngasekupheleni kuka-Ephreli. Sizobe silalela abafuna ukuza ngokusemthethweni bazokwethula. Ngemuva kwalokho sizohlangana noMnyango wezeMpilo sithi yilokhu abantu baseNingizimu Afrika abakushoyo.”
Ikomiti libambe ezinye izigcawu eGreenwood Park Community Hall ngo-10 ekuseni kwaze kwaba ihora lesi-3 ngeSonto ntambama.