AMAPHOYISA aKwaZulu-Natal abophe abasolwa abathinteka ecaleni lokubulala abantu abahlanu e-EMtshezi. NgeSonto, oshayasibhamu abayisithupha abebezifihle ubuso bavulele ngenhlamvu emzini oseNyezane.
Umsolwa, oboshwe ngeSonto, uvele enkantolo yendawo ngoLwesibili.
Okhulumela amaphoyisa esifundazweni uRobert Netshiunda uthe laba abanye abahlanu babanjwe e-Acaciaville eMnambithi ngoMsombuluko.
Ngokwesitatimende samaphoyisa eSAPS, umkhankaso oholwa ngabeCrime Intelligence ngoMsombuluko ntambama mhla zingama-28 kuMfumfu (October) uveze indawo lapho abasolwa bebecashe khona e-Acaciavale, eMnambithi. Abasolwa abahlanu batholwe becashe ekamelweni baboshwa. Batholakale nezibhamu ezimbili zohlobo lwe-AK-47 nezinhlamvu ezingu-115, izibhamu ezimbili ezinezinhlamvu ezingu-12, i-.38 Special revolver eyodwa nezinhlamvu eyodwa, kanye nemoto abayisebenzise ngesikhathi bebaleka endaweni yesigameko. .”.
Uthi bathole izinhlobonhlobo zezibhamu.
“Kuphinde kwatholakala nemoto abebebaleke ngayo endaweni yesigameko. Esinye sezibhamu ezitholiwe ngesowesilisa obulawe ngesikhathi kudutshulwa abantu ngeSonto. Uphenyo luphinde lwaholela amaphoyisa emzini oseZakheni lapho kutholwe khona esinye isibhamu. . Izibhamu ezitholiwe zizoyiswa kohlolwa ukuze kuqinisekwe ukuthi azixhumene yini nezinye izigcawu zobugebengu esifundazweni nasezindaweni ezizungezile.
“Abasolwa abahlanu abaneminyaka ephakathi kuka-23 no-46 bazovela eNkantolo yeMantshi yaseMnambithi ngoLwesithathu ngamacala okutholakala nezibhamu nezinhlamvu okungekho emthethweni.
“Emuva kwalokho bazoyiswa e-Estcourt ukuyobhekana namacala amaningi okubulala. Umsolwa, 28, oboshwe ngeSonto uzovela eNkantolo yeMantshi yase-Estcourt ngoLwesibili ngamacala okubulala.”
Uthe kukholakala ukuthi bayathinteka emacaleni okwebiwa kwemfuyo nawokubulala endaweni.