Kushone abantu abangu 45 engozini yebhasi ebelithwele abantu abasuka eBotswana belibangise eMoria eLimpopo enkozweni.
Lengozi yenzeke kuR518 ngaseMakopane emgwaqeni uMamatlakala izolo ebusuku.
Lelibhasi belithwele abagibeli nakho konke abebezokudinga phambili okufana nezitofu nokunye njengoba bebeyochitha impelasonto yonke enkozweni. Ibhasi liwele emaweni labe selithungeleka ngomlilo kwasinda ingane eyodwa eneminyaka eyisishiyagalombili.
UNgqongqoshe wezokuthutha kuleli uNKK Sindisiwe Chikunga ufikile endaweni yesigameko wadlulisa amazwi enduduzo kwimindeni elahlekelwe wabe esecela abashayeli ukuba bashayele ngokucophelela ukuqinisekisa ukuphepha kwabagibeli.
Imbangela yengozi ayikaziwa.