IMamelodi Sundowns ithwale kanzima inqoba ngo 2-0 ishaya iMaritzburg United edlala kwiMotsepe Foundation Championship eTshwane ngeSonto ukuze ifinyelele kuma-quarterfinal eNedbank Cup.
UThembinkosi Lorch ushaye igoli ngesikhathi amaBrazilians efinyelela esigabeni samaqembu ayishiyagalombili kulomqhudelwano onesiteki semali eningi kuyedlula yonke. Uvalele enethini igoli lokuqala sekusele imizuzu engu-15 umdlalo uphele emva kwengcwenga yepass evele kuBongani Zungu.
URulani Mokwena wenze izinguquko ezimbalwa eqenjini elidlale ngokulingana ngo 1-1 neSuperSport United phakathi nesonto. URonwen Williams, Zuko Mdunyelwa, Themba Zwane noTeboho Mokoena bonke banikezwe ukuphumula.
Lezi zinguquko zibe nomthelela kuleli qembu njengoba belingadlali kahle ngesikhathi libhekene neqembu leMartitzburg elivele lapaka ibhasi ngmumva lalinda iSundowns ukuthi yenze amaphutha.
Unompempe uCedrick Muvhali uphoqelekile ukuthi amise umidlalo ngemuva kwemizuzu engu-15 ngenxa yesimo sezulu ebelina liduma liklwebha imibani. Womabili la maqembu aphindele egunjini lokushintshela ukuze baphephe kodwa umdlalo uqhubekile ngemuva kwehora njengoba izulu libe seliphenya.
AmaBrazilians ahlulekile wukuthola umgqigqo, umdlalo uye ekhefini engenalutho. ULorch uvalele igoli lokuqala ngomzuzu ka-75 nokubuyise amathemba okunqoba kuMamelodi Sundowns.
Leli goli belibaluleke kakhulu kulomdlali obegijima ku-Orlando Pirates ukuze akhombise uzinzo kuleliqembu elihlonishwa i-Afika yonke. Lo mdlali oneminyaka engu-30 ubudala useshaye amagoli amathathu egqoke ijezi laMasandawana ngemuva kokuvula i-akhawunti yakhe neFC Nouadhibou koweCaf Champions League ngenyanga edlule.
ISundowns izobhekana ne-Orlando Pirates, SuperSport United, AmaZulu, Stellenbosch FC, Chippa United, Stellenbosch FC, Chippa United neTS Galaxy lawa okungamaqembu asele kuNedbank Cup.
I-University of Pretoria iyona kuphela iqembu leMotsepe Foundation Championship elisasele kulo mqhudelwano ngemuva kokuhlula iMoroka Swallows ngo 2-1 ngoLwesihlanu.