INkantolo yesiFunda yaseMnambithi igwebe udilikajele owesilisa oneminyaka engu 41 owavuma icala ngecala lokudlwengula intombazane eneminyaka emihlanu ngoNovemba 2018 endaweni yaseMnambithi.
Lomlisa kuthiwa ubengumakhelwane kanye nomalume womunye wabangani bakamgilwa. Ngelanga lesigameko lomlisa kuthiwa wayenga lengane ukuthi imlandele ngesikhathi idlala ngaphandle kwasekhaya. Wabe esemyisa endlini engasahlali muntu nalapho afike amnukubeza khona ngokocansi. Emuva kokugila lomkhuba wabe esemnika u-R1 wamyalela ukuthi angatsheli muntu ngalesi sigameko. Nokho, ingane yabikela unina ngesikhathi ibuyela ekhaya, okwaholela ekuboshweni kwalo mlisa.
Ngesikhathi kuqhubeka icala umshushisi weNkantolo yesiFunda, uMnuz Sandisiwe Ntuli, ukugcizelele ukuthi umsolwa, njengoba engumuntu omdala owaziwa yingane, wephule ukwethenjwa kwakhe. UNtuli uphinde waveza ukuthi kukhona ubufakazi bolibofuzo obumatanisa umsolwa naleli cala.
Inkantolo igwebe ummangalelwa udilikajele yathi akakufanele ukuhlangana nezingane. Ukwengeza, uthathwe njengokungafaneleki ukuba nesibhamu, futhi igama lakhe layalelwa ukuba lifakwe kuRejista Kazwelonke yabahlukumezi bocansi.
UNatasha Ramkisson-Kara, okhulumela i-NPA esifundeni sase-KZN, uzwakalise ukugculiseka ngesinqumo secala futhi wancoma imizamo yabo bobabili abashushisi namaphoyisa, egcizelela ithemba lokuthi lesi sigwebo sizoba ngumyalezo onamandla ovimbayo.