Umasipala wase-Alfred Duma uthi ukulungiswa kwemigwaqo kuzohamba phambili emizamweni yabo yokubuyisela isimo eMnambithi.
Lokhu kuza ngemuva kokuthi izimvula ezinamandla ezinsukwini ezimbalwa ezedlule zidale umonakalo kwingqalasizinda eningi.
Inqwaba yemindeni kudingeke ukuthi ikhishwe ezindlini zayo ithuthelwe emahholo omphakathi ngenxa yezikhukhula enkabeni yedolobha.
Eminye yemigwaqo okuhlanganisa no-N11 phakathi kweNewcastle neLadysmith kudingeke ukuthi ivalwe isikhashana ukuze kwehliswe ubungozi.
IMeya uZama Sibisi ithi bayazicosha lezi zicucu ngaphambi kokuvulwa kwezikole ngesonto elizayo.
Uphinde wazwakalisa ukukhathazeka ngabantu abazishaya indiva izexwayiso zezikhulu.
“Namanje ugesi kwezinye zezindawo uthintekile kwezinye izindawo, sibe nezimvula ezinamandla, ngenxa yesiphepho ezinye izindawo azinawo ugesi noxhaxha lwethu luphazamisekile.
“Ngithanda ukunxusa nalabo abangasiza, ngokubanikeza ukudla nezingubo zokulala labo bantu abakhishiwe. Imizi yabantu ilimele abanalutho, igrosa yabo ibhidlikile. Sidinga usizo olukhulu.”