Owayengumsakazi owaduma kakhulu esakaza kwiGagasi FM ohlelweni lodumo lwasekuseni i-Alex and the Crew, uKininonke Shandu, oteketiswa ngelikaKini usephumile emakethe ngokusemthethweni. UShandu uzobe eyokwembesa ingoduso yakhe, u-Andile Khanyile, ngoMgqibelo KwaNongoma.
Ngokwemithombo esondelene nalezi zithandani, lomcimbi kulindeleke ukuthi uhanjelwe osaziwayo abaningi ikakhulukazi abakulesi sifundazwe saKwazulu Natali.
UKini owaziwa kakhulu ngamahlaya ezinkundleni zokuxhumana futhi ongumsunguli womcimbi wezindondo owaziwa ngokuthi yiSebenza Womens Awards, waphinde waduma kakhulu engumethuli wohlelo iDaily Thetha kuSABC 1.
Ebuzwa ngalokhu uKini ubeke kanje, “bheka ngaphandle kokungena emininingwaneni yebo ngiyambesa kule mpelasonto, ngijabule futhi nginovalo ngesikhathi esifanayo ngoba singena esigabeni esisha sobudlelwano bethu,” usho kanje.