Ibonga umalume wayo ngokuba yisibonelo esihle kuyo intokazi esencane esanda kusungula iqembu lebhola lomnqakiswano labantu besifazane abasebancane.
UThobile Magudulela wasendaweni yaseTholeni eMnambithi uphenduke undaba mlonyeni ngokuqoqa abantu abasha besifazane abafundise ukudlala ibhola lomnqakiswano. UThobile uthi into emenze wanentshisekelo yokusungula leliqembu ukubona abantu abasha bengenayo into abayenzayo ikakhulukazi uma bebuya esikoleni. Lentokazi ithi iningi labo ligcina lingene ezintweni ezimbi njengezidakamizwa notshwala.
lentokazi ithi ngale ckokuthi uyathanda ukubona intsha yenza okuthile, yaphinda yagqugquzelwa ngumalume wayo uHenry “Sash Omnyama” Ndlovu owayedume kakhulu kulendawo ngokudlala ibhola nowaphinde waba ngomunye wabasunguli beqembu lebhola lezinyawo elalaziwa ngokuthi yiTholeni Tigers,”Umalume wayesebenza kanzima ukuqoqa nokufundisa intsha ibhola endaweni, lokho kwangenza ngafisa nami ukukhula maqede ngihambe ezinyathelweni zakhe. Nami iqembu lami ngiliqambe ngeleTigers,” kuchaza lentokazi.
Phakathi kwezingqinamba abhekana nazo nsuku zonke kuye kube yindawo yokuziqeqesha kanye nezinsiza zokuziqeqesha ezifana namabhola kanye namapali,”ikhona inkundla uyomphakathi emamapali kodwa inkinga ikude kakhulu kanti nabantwana laba basebancane kakhulu,” kuchaza lentokazi.