NJENGOBA eke wasebenza noGavin Hunt phambilini kuBidvest Wits, umdlali omusha weSuperSport United uVincent Pule unethemba lokuthi lo mqeqeshi uzophinde athole okungcono kakhulu kuyena.
UPule ujoyine aMatsatsantsa a Pitori njengomdlali okhululekile ngemuva kokuhlukana ne-Orlando Pirates ahlala kuyo amasizini ayisithupha.
Kumasizini edlule ubedonsa kanzima ngenxa yokulimala nokuholele ekutheni alahlekelwe yindawo yakhe yokuqala kuBhakabhaka. Kodwa ngemuva kokuhlangana noHunt, lapho esayine khona inkontileka yonyaka, lo mdlali ohlaselayo uthe uHunt uzomsiza abuyise ukuzethemba.
“Ngijabule kakhulu ngokuba lapha. Ngihlangane nabantu abambalwa engibaziyo futhi ngibheke ngabomvu isizini entsha,” kusho uPule kwabezindaba izolo ngemuva kokuthi iqembu lethule umxhasi walo omusha i-ACDC eRandburg.
“Ngike ngasebenza nomqeqeshi uGavin phambilini futhi lokho kuzongisiza lapha. Ngimqonda njengomuntu, njengobaba, futhi unalowo mqondo engiwuthandayo – wokunqoba izindebe nokuqhudelana nokuwina yonke imidlalo. Ngicabanga ukuthi uzongisiza kakhulu ekubuyiseleni ukuzethemba kwami.”
UPule unomuzwa wokuthi usekunqobile ukulimala kwakhe futhi ufuna ukusiza aMatsatsantsa ukuthi awine indebe eyodwa noma ezimbili ngesizini entsha. “Kuzoba yisizini ethokozisayo futhi sibheke ngabomvu ukuncintisana kuyo yonke imiqhudelwano. Ngethemba ukuthi sizowina indebe eyodwa noma ezimbili,” kusho yena.
“Ngizabalaze kakhulu ngokulimala; kusukela ngilapha, bengiziqeqesha nsuku zonke njengomuntu oneminyaka engu-20. Umqeqeshi uGavin usebenza kanzima, ungumuntu othanda ukuwina ngazo zonke izindlela. Ngicabanga ukuthi njengabadlali kubaluleke kakhulu ukungena kulowo mqondo wokuthi: ‘Sizoqhudelana ngakho konke futhi yilokho esizokwenza kule sizini’.”
Umdlalo wokuqala kaPule weSuperSport uzobhekana neqembu lakhe lakudala iPirates ku-quarterfinal yeMTN8 e-Orlando Stadium ngoMgqibelo (6pm), futhi ugcizelela ukuthi ugxile kakhulu ukusiza iqembu lakhe elisha liwunqobe lo mdlalo.
“Kubaluleke kakhulu ukugxila njengeqembu. Umqeqeshi uhlale esitshela ukuthi sigxile njengeqembu hhayi njengabantu ngabanye. Lo mdlalo ozayo uzoba nesasasa, futhi ngicabanga ukuthi simi ngomumo njengeqembu. Sikulungele ukuncintisana futhi siwine umdlalo. Ibhola, kufanele ugxile lapho ukhona.”