Ushiye angalazi umsakazi weVuma FM kwabamsola ngokuzama ukumxabanisa noPenny Ntuli ngokumgcoba njengomuntu onomona nozama ukuntshontsha ukugqama kukaPenny.
UJacinta MaNgobese Zuma ungene kuFacebook wakhe onabalandeli abangaphezu kuka 300 000 wakhwela wadilika kubantu athi bazama ngayo yonke indlela ukuxabanisa abantu besifazane. Lomsakazi uthi kunabantu abathi ubegudla uPenny Ntuli ngesikhathi ebhala ekhasini lakhe ekhuza abakhuluma izinto ezimbi ngabantu abebevaleleke emgwaqeni owuthela wayeka u-N3 ngesikhathi kulele ungqoqwane ngempelasonto.
Upenny Ntuli ubengabane babantu abebevaleleke kulomgwaqo, kanti ubelokhu etshela abalandeli bakhe ekhasini ukuthi sekwenzakalani. Ngokusho kukaJacinta kwi-Live yakhe uthi abantu bathi ugudle uPenny ngakusho kuFacebook ekhuza abantu ukuthi bengasho izinto ezizokwenza ababambeke kungqoqwane balahle ithemba, “akusimina ngedwa obebhala ekhuza abantu ukuthi bengabhali izinto ezimbi ngababambeke eqhweni, nabanye abafana noMandla Chris noSithembiso Mngoma babhalile ngalokhu kodwa yimina kuphela othola amachaphazelo. Kukhona abantu abahlale befuna abantu besifazane bahlale belwa njalo nje. Mina noPenny siyazana, asazani la kuFacebook kuphela. Sengisebenze naye isikhathi eside, mhlawumbe nicabanga ukuthi ngimazela kuFacebook njengani,” kuthetha lentokazi.
Ube esenxusa abantu abangamthandi nabangahambisani nezinto azibhala ekhasini lakhe ukuthi bamshiye ngokuthula, “Anginankinga mina noma ngingasala nabantu abangu 50 000 kuphela, angizelanga kuFacebook ukuzolandelwa futhi angikaze ngigudle muntu. ngicabanga ukuthi uma umuntu nginenkinga naye ngiyakwazi ukumqonda ngqo. Angithandi futhi ngiyagwema ukulwa nabantu besifazane ngaso sonke isikhathi futhi angifune kuthandwa yini. Uma ngifuna uthando nginabantwana, nginomndeni nomyeni abangithandayo.”