Umhlangano obuphakathi kwekomidi elimele umphakathi endaweni yaseTsakane eMnambithi noMaspala i-Alfred Duma kanye nosonkontileka oqokelwe ukwakhiwa kwezindlu kulendawo uMpheme Construction uphele kuphunywe nesinqumo sokuthi kuqhutshekwe kwakhelwe umphakathi walendawo izindlu.
Kudingeke ukuthi kumiwe ukuqala kokwakhiwa kwalezi zindlu ngeviki eledlule ngemumva kokuthi umphakathi ukhale ngezinto ezithile ezenzekayo ongahambisani nhlobo nazo. Lomphakathi ohlanganisa umphakathi wase Tsakane ePhase 1 okungu ward 9 ngaphansi kweKhansela uSithole kanye nomphakathi wasePhase 2 ongaphansi kweKhansela uXaba, ukhala ngokuthi usonkontileka oqokelwe ukwenza lomsebenzi uthi angeke ubakhele abantu abangekho ohlwini olusha labazokwakhelwa izindlu yize noma babekhona ohlwini oludala lwezindlu ezagcina zingaqedelwanga ukwakhiwa ngenxa yezinkinga ezithile. Lomphakathi uthi, kunezindlu ezazakhiwa zangaqedwa, ezinye zazo zashiywa kusakhiwe imfayindishi kuphela. Iningi labanikazi balezo zindlu abaveli ohlwini olusha. Umphakathi uthi ufuna ziqedelwe lezi zindlu noma ngabe ohlwini olusha aziveli.
Okunye lomphakathi obukhala ngakho ukuthi imali ebekwa etafuleni ngusonkontileka eqondene nosonkontileka bendawo nabo okulindeleke ukuthi bahlomule kuloluhlelo incane kakhulu. Bacele ukuthi lenkampani ike ilubhekisise udaba oluthinta imali futhi bengajabula kakhulu uma ingakhushulwa lemali ukuze kusebenzeke kahle.
Obemele uMaspala uMnumzane uNgiba ukuqinisekisile ukuthi zonke izindlu ezaqalwa zasala kanjalo kuhlelo oludala zizoqedelwa nazo kanye nalezi ezintsha ezizokwakhiwa. uphinde wathembisa futhi ukuthi bazobuyela emphakathi kungekudala ngodaba oluthinta izimali zosonkontileka bendawo.
Ukwakhiwa kwalezi zindlu kulendawo kulindeleke uthi kuqale ngoMombuuko wangesonto elizoyo.