Ihhovisi likaNdunankulu waKwaZulu-Natali selikhiphe isitatimende emva kokuthola izincwadi eziningi licelwa ukuthi lubheke udaba lokudicilelwa phansi kwesithunzi sabesimame bakuleli ezinkundleni zokuxhumana.
Lokhu kuza emva komsindo oke wabakhona enkundleni uFacebook obuphakathi kwabahleli bemicimbi abaziwayo kuleli uKini Shandu noXolani Mcineka ngodaba lwemibono yabo ngabesimame. lemibono idale ukuthi abanye besifazane abanjengoMsakazi uJacinta Ngobese bazwakalise ukungenami ngayo.
Nasi isitatimende sehhovisi esiphelele ngezansi:
IHhovisi likaNdunankulu waKwaZulu-Natal liyakuqinisekisa ukuthola izincwadi ezivela kwabesifazane abathintekayo, izishoshovu kanye nezinhlangano ezingochwepheshe ezigxeka ukusetshenziswa kolimi oludelela abesifazane okuthiwa lwenziwa ngabahlaziyi besilisa abaqavile emphakathini.
UNdunankulu waKwaZulu-Natal, uNkk Nomusa Dube-Ncube, usejube iHhovisi Lesimo Sabesifazane eHhovisi likaNdunankulu ukuthi libhekisise izincwadi nezinsolo eziqukethwe kuzo. Okubalulekile kulolu hlelo, kuzoba ukusebenzelana nabahleli bezincwadi nokufinyelela kulabo abathintekayo ekubhaleni ukuze kutholwe isithombe esigcwele.
UNdunankulu uzigxeka kakhulu izenzo zodlame olubhekiswe kwabesifazane kanye namaqembu asengozini, kungakhathalekile ukuthi lokhu kuzibonakalisa ngokuthintana ngokomzimba noma ngokubukela phansi isithunzi sabesifazane njengoba kushiwo kulesi sigameko.
Nakuba uNdunankulu eboshelwe umyalelo woMthethosisekelo wokuthi ahloniphe futhi akhuthaze amalungelo abantu, okuhlanganisa nenkululeko yokukhuluma nelungelo lesithunzi, uNdunankulu akananazi ekugomeleni kwakhe ngokuthi inkululeko yokukhuluma ayilona ilungelo eliphelele njengoba inemingcele yoMthethosisekelo.
Ngakho-ke uNdunankulu uvumelana nezimiso zoMthethosisekelo zokuthi ukusetshenziswa kwelungelo lenkululeko yokukhuluma, nakuba liyisisekelo, kufanele kube ngendlela yokuthi akuphuli amalungelo noma kubangele ukulimala kwabanye abantu.
Ekubhekaneni nalesi sikhalo, iHhovisi likaNdunankulu lizophinde lizame ukulinganisa phakathi kwala malungelo.
Kuze kube manje, iHhovisi likaNdunankulu lifuna ukugqugquzela inkhulumomphendvulwano engagwegwesi njengendlela yokubhekana nalokhu kanye nezindaba ezifanayo esikhathini esizayo.
Okwamanje, iHhovisi likaNdunankulu linxusa labo abathintekayo kulesi sikhalo kanye nomphakathi jikelele ukuthi ugweme ukukhuluma budedengu emphakathini okungase kubhebhethekise isimo.
IHhovisi likaNdunankulu liyaqhubeka nokunxusa wonke amalungu omphakathi ukuthi ahlangane ekulweni nesihlava se-GBV, noma nini lapho iphakamisa ikhanda layo elibi nelicekela phansi. Iphinde ibize bonke abesilisa nabesifazane abathanda ukuthula ukuthi bakhulume futhi babe nonya ekulweni ne-GBV.
Uhulumeni Wesifundazwe umemezele i-GBV njengobhubhane oluthiya ukuchuma nokuthula kwabesifazane okufanele kubhekwane nabo izinsuku ezingama-365 ngonyaka.