Sekuqubuke indida ngencwadi okuthiwa ivela emnyangweni wezezindlu KwaZulu-Natal evimba ukuthi uMaspala i-Alfred Duma Municipality ungaqhubeki nohlelo lwayo lokuyokwethula ngokusemthethweni usonkontileka ozokwakha izindlu endaweni yakwaSomsuku naseSkoko.
Lomaspala, ubunezinhlelo zokwethula usonkontileka ozokwakha lezi zindlu khona namhlanje kulezi zindawo. Lencwadi, esabalale ezinkundleni zokuxhumana izolo ntambama ithi akufanele neze ukuthi uMaspala kube yiwona owenza lokhu ngoba lezi zindlu azizukwakhiwa yiwona kodwa zizokwakhiwa nguhulumeni wesifundazwe, ngakho yiwona kuphela onelungelo lokuhambisa lezi zindlu kubantu.
Imeya kamaspala i-Alfred Duma uKhansela Zama Sibisi ekhuluma eMsakazweni Inqubeko FM ekuseni namhlanje uthe, okubadida kakhulu ngalencwadi ukuthi imenenja kaMaspala uMM Ngiba uyithole ekuseni namhlanje ngezithuba zokugamanxa kwehora lesikhombisa lencwadi, ekubeni ibivele isisabalele ezinkundleni zokuxhumana izolo ebusuku. IMeya ithi umbuzo abazibuza wona yilo wokuthi kwenzeke kanjani ukuthi lencwadi ifike ezandleni zabanye abantu ingakafiki kuloyo ebheke kuye ngqo okuyiMenenja kamaspala.
Usole kakhulu lomnyango nohulumeni wesifundazwe ngokudlala ipolitiki ngezimpilo zabantu. USibisi uqhube wathi bona njengomnyango abadidekile nhlobo, bayazi ukuthi uhlelo lwezindlu lwenganyelwe uhulumeni wesifundazwe, kodwa bona bebeya njengabantu abasebenza nomphakathi nsuku zonke. Uze wenza isibonelo ngabanye oMaspala athi bona behlezi bebethula osonkontileka akukaze kusuke msindo ngoba labomaspala bephethwe yiqembu le-ANC.
Umnyango wezezindlu wesabise ngokuthi uzoyeka ukwakha lezi zindlu uma ngabe lomaspala uqhubeka nalezi zinhlelo.
Umeya uphethe ngokuthi bazoyihlonipha lencwadi bengangamethuli usonkontileka, kodwa bazoqhubeka baye ebantwini bakhulume ngezidingo zabo njengokwezinhlelo zabo zanamhlanje.