UNgqongqoshe wezeMidlalo, ubuCiko namaSiko uGayton McKenzie uthi imali engu-R800 000 esetshenziswe ngohambo lwakhe lokuya kuma-Olympics eParis, eFrance ingaphakathi kwemigomo yemali okumele isetshenziswe ongqongqoshe.
Kube nezikhalo ngemali eningi esetshenziswe kulolu hambo.
UMcKenzie uthi umsebenzi wakhe wukuhambela imicimbi yezemidlalo kanti ukuhambela kwakhe ngeke kuqhathaniswe noSuperfan, uMama Joy.
Uthi, “Uyazi bengisematheni ngokuchitha imali, ngiya eParis. Ezinsukwini ezimbili ezedlule, kwadingeka ngiphendule ngibizwa ngokuthi ngiwu “Mr Joy Ride”… Ngaqale ngacasuka kakhulu ngoba babeqhathanisa nokuthi, ‘bathi ngisuse uMama Joy ngase ngizifaka esikhundleni sakhe. Ngathukuthela, ngase ngikhumbula ukuthi ngisebenzela uhulumeni, kufanele ngiphumele obala njalo ngezenzo zami. Angikwazi ukucasuka njalo uma abantu bengibuza ngemali yabo ngoba isenti lonke engilisebenzisayo ngelabantu.”
UMcKenzie uthi uhambele imihlangano eyisithupha ngaphambi kwama-Olympics.
“Okokuqala, uhambo lwami lokuqala njengoNgqongqoshe beluya kuma-Olympics. Ngafika sekusele isonto ukuthi kuqale ama-Olympics. Ngaya emihlanganweni eyisithupha ehlukene, ngahambela umhlangano nongqongqoshe base-Afrika, nongqongqoshe beCommonwealth, ngahambela umhlangano lapho ngangimele khona uNgqongqoshe Wezamaphoyisa, ngahambela umcimbi wokuvula.”
“Ngakho-ke ngaba nemihlangano eyisithupha okwakumele ngiye kuyo, manje ngaphambi komcimbi wokuvula, kwaqala umbhoxo kulabo abangazi, ngahamba ngayobuka i-Rugby yamaSevens. Kuthe uma kuqala ama-Olympics ngahlala eringini ukuze abasubathi bethu bathole umuntu obakhalelayo lapho,” engeza.