UDan Malesela udalule ukuthi angakwamukela ukuba yiphini lomqeqeshi eqenjini elifana neMamelodi Sundowns uma ithuba livela, egcizelela ukuthi akagxeki ukuqokwa kukaRomain Folz ngoba ubewugaqele lomsebenzi.
UMalesela, obengasebenzi selokhu asuswa esihlalweni esishisayo yiBaroka ngesikhathi kuqhubeka imidlalo yama-play-offs ngenyanga edlule, usanda kugxeka ukuqokwa kukaFolz njengomsizi womqeqeshi, wathi uyangabaza ukuthi lesi senzo sihle ebholeni laseNingizimu Afrika.
Manje uMalesela akakakufihli ukuthi angasebenza njengephini lomqeqeshi weSundowns, uma kuvela lelo thuba esikhathini esizayo. UMalesela uphinde wachaza ukuthi kungani engabaza ukufika kukaFolz. UFolz uke wathwala kanzima njengomqeqeshi kuMarumo Gallants nakuMaZulu.
“Kungazwakala sengathi ngiyazifunela umsebenzi [weSundowns] ekubeni kungenjalo ngempela kodwa iSundowns yiqembu engingalijoyina njengephini lomqeqeshi,’’ kusho uMalesela etshela izintatheli emcimbini womqeqeshi uPitso Mosimane wokubungaza ukuhlonishwa kwakhe yi-University of Johannesburg kanye nosuku lwakhe lokuzalwa ehlanganisa iminyaka engu-60 e-FNB Stadium ngoLwesihlanu.
“Ngokuqokwa kukaFolz bengikhuluma nje ngizwakalise ukukhathazeka ngoba eNingizimu Afrika abasizi babaqeqeshi abanalo izwi lokugcina, pho kungani kulandwa umuntu wangaphandle ongeke abe nezwi lokugcina? Yilokho ebengikhathazekile ngakho futhi ngikhathazekile izinga lokulandelana kwabaqeqeshi okufanele sibe nalo ezweni…kubukeka sengathi asikhathazekile ngabaqeqeshi bethu basekhaya.”
UMalesela uqinise isithunzi sakhe njengomqeqeshi ohlonishwa kakhulu ngesikhathi esiza iTS Galaxy yanqoba iNedbank Cup ngesikhathi isesigabeni sesibili ngo-2018. Lo mqeqeshi owake waqeqesha kuChippa United uthe unephupho lokuqeqesha iqembu elinezinsiza ngelinye ilanga, ezikhalela ngokuthi akakaze ahlangabezane nalokhu emsebenzini wakhe wokuqeqesha.
“Akufana nokuthi angikaze ngiqeqeshe amakilabhu amahle kodwa angikaze ngiqeqeshe amakilabhu anezinsiza…angizange ngibe nalobu bukhazikhazi. Angizange ngibe nethuba lapho ngikwazi ukukhomba umdlali ngithi, ‘Ngiyamfuna lowo mdlali’, futhi ngiyamthola…Bekulokhu kuqedwa lapho nalapha,” esho.