UNGQONGQOSHE wezokuBusa ngokuBambisana, uMnuz Velenkosini Hlabisa, usememezele u-R1.4 billion wesikhwama sokusiza ezindaweni ezikhahlamezwe yizikhukhula ezifundazweni ezinhlanu. Le mali izosiza omasipala abangu-60 KwaZulu-Natal, Eastern Cape, Free State, Mpumalanga naseLimpopo.
Ekhuluma esithangamini nabezindaba ngoMsombuluko, uHlabisa uthe lezi zimali zabiwe phakathi kwenyanga edlule nale nyanga ukusiza ukwakhiwa kabusha kwengqalasizinda ecekelwe yizikhukhula zakamuva.
E-KZN, omasipala baseMpendle naseMajuba bathole izabelo ezinkulu, ngo-R15.5 million no-R8 million ngokulandelana. Ezinye izindawo ezithintekile njengoMsinga, Jozini kanye noMsunduzi zithole phakathi kuka-R4.8 million no-R6.6 million.
Iminyango yezifundazwe iphinde yathola ukwesekwa okuhlanganisa u-R15 million wezeMfundo, u-R10 million wezoLimo no-R19 million wezeMigwaqo.
Iphakethe losizo lihlose ukusheshisa ukwelulama emiphakathini ehlaselwe yizikhukhula ezinamandla.