Uchazwe njengeqhawe ebelibathanda kakhulu abantu uMfundisi Erlo Hartwig Stegen obedume ngelikaStekeni ongumsunguli webandla laKwaSizabantu eKranskop.
Izikhulumi ezehlukahlukeni zishiyelane inkundla zikhuluma ngaleliqhawe enkonzweni yakhe yokumphelezela ebibanjelwe khona kwaSizabantu izolo ngeSonto. UStekeni, wedlule emhlabeni ngesonto eledlule emva kokuhlatshwa wukugula isikhashana.
Lowo owayenguMengameli wezwe uMnumzane Jacob Zuma, ubengabanye abebehambele lenkonzo yomncwabo. uMsholozi uthi uStekeni ubeyindoda eqotho futhi ethanda uNkulunkulu ngenhliziyo yayo yonke. uphinde uhpinde wamchaza njengendoda eneqiniso futhi elimelile iqiniso kwaze kwaba sekugcineni kwempilo yayo.
UNgqongqoshe wezezimali KwaZulu-Natal uNkosikazi Peggy Nkonyeni uthe, uStekeni ubeyiqhawe kwisifundazwe sonke lesi sakwaZulu-Natal. “Umnumzane uStugen ubeyiqhawe elingavumanga ukuthi uhulumeni wobandlulule umsebenzise ukuhlukanisa abantu bakuleli ngokobuhlanga, wama walimela iqiniso, futhi waqhubeka Waphila nabantu abamnyama yize noma umthetho ubungavumi. Ngakho ke silahlekelwe kakhulu siyisifundazwe.” Kusho uNkonyeni.
Inkonzo yakhe yomncwabo ibisaKazwa bukhoma emsakazweni iKhwezi FM nokuwumsakazo owasungulwa nguye ngonyaka ka1995.