NJENGOBA i-Orlando Pirates ne-Al Ahly bezimisele ngokuvuselela ukuqhudelana kwabo emdlalweni kaGroup C weCAF Champions League e-Orlando Stadium ngoMgqibelo (3pm), owayengumdlali uBenni McCarthy akakaqiniseki ukuthi amaBhakabhaka anokujula okwenele yini ukuqhudelana naleli qembu eliyinkunzi e-Afrika.
Ekhuluma emcimbini wabezindaba weCarling Black Label ekuqaleni kwaleli sonto eSandton, uMcCarthy uthe amaBhakabhaka kufanele agxile emqhudelwaneni owodwa lapho ezofaka khona wonke amandla awo.
IPirates iqale imidlalo yamaqoqo ngokunqoba ngo 2-1 ekuhambeni ku-CR Belouizdad kanti izoba nesivivinyo esikhulu kunazo zonke uma izobhekana nompetha abavikela isicoco i-Ahly namuhla. I-Ahly isinqobe lo mqhudelwano irekhodi izikhathi ezingu-12, ukudlula wonke amakilabhu ezwenikazi.
“Ngiyethemba ukuthi baqine ngokwanele, kuze kube yimanje benza kahle kakhulu. Kodwa ngicabanga ukuthi uma ufuna ukunqoba isicoco se-PSL [Betway Premiership] futhi ufuna ukuya kowamanqamu weChampions League, uzodinga izikwati ezimbili,” kusho uMcCarthy.
“Kanti ubonile bedlala neStellenbosc [emdlalweni weligi lapho behlulwe khona ngo 0-1 ngeSonto], uthola ukuthi kuya kuba nzima.”
“Ngiyethemba ukuthi bazojula ngokwanele futhi babuyise abadlali babo abalimele futhi bangabagcini bengenakulimala ngoba bazodinga wonke umdlali.”
Njengamanje lezi zinkunzi zase-Egypt zibambene ngamaphuzu amathathu nePirates ngemuva kokuyinqoba yomibili imidlalo yokuvula.
AmaBhakabhaka azothola ugqozi ngokuthi aqumba phansi i-Ahly ngo-2013, ngaphambi kokuthi adlale ngokulingana ngo 1-1 emlenzeni wokubuyela kuGroup A.
Baphinde badlala ngokulingana ngo 1-1 ngaphambi kokunqoba ngo 2-0 e-Egypt kowamanqamu wemilenze emibili ngonyaka ofanayo.
IPirates izophinde ithembele efomini yayo yasekhaya okuyiyona eyenze ukuthi umkhankaso wayo uwuqale kahle lo mqhudelwano.
Abadlali abancane abafana noRelebohile Mofokeng noMohau Nkota bazobheka ukuqhubeka lapho begcine khona bebhekene neBelouizdad emdlalweni wokuvula.