UNGQONGQOSHE wezoLimo uMnuz John Steenhuisen usenwebe indawo yokuLawulwa kweZifo (DMA) KwaZulu-Natal ngemuva kokutholakala kwezinkomo ezinamatele iFoot and Mouth Disease (FMD) eNewcastle. Amatele yisifo esibi kakhulu sezilwane esilawulwa uMthetho Wezifo Zezilwane ka-1984. Lo mthetho udinga izinyathelo eziqinile njengokuhlukanisa izilwane ezigulayo kanye nokunciphisa ukunyakaza kwazo, ophethwe yi-Veterinary Services.
Okhulumela uMnyango uJoylene van Wyk uthe ukubheduka kwe-FMD e-KZN namanje akukalawuleki, njengoba kusanda kuvela amacala amasha eNewcastle. Lesi sifo sisabalale sadlula i-DMA yokuqala eyabheduka ngo-2021 lapho uhlobo lwe-SAT2 FMD luvela okokuqala esifundeni.
Ukunqanda leli gciwane ukuthi lisabalale, ungqongqoshe usenqume ukwandisa i-DMA okuwuhlelo lokulawula ukusabalala kwalesi sifo. Lesi sinyathelo sizosiza ukulawula ukuhamba kwezilwane njengezinkomo, izimvu, nezimbuzi, kanye nemikhiqizo yazo, ezindaweni ezithintekile. Ukuhambisa lezi zilwane, imikhiqizo yazo, noma izakhi zofuzo ngaphandle, noma ngaphakathi kwe-DMA manje sekuvinjelwe ngaphandle uma kugunyazwe imvume yodokotela wezilwane kahulumeni. UVan Wyk wengeze ngokuthi imingcele emisha ye-DMA izomenyezelwa ngokusemthethweni kuGazethi kaHulumeni maduze.