Iqembu le-MK KwaZulu-Natal lihlukene phakathi njengoba kunezinhlangothi ezimbili ezibangayo ezisebenza esiShayamthetho sesifundazwe. Ngokwephephandaba iTimes Live iqembu elilodwa liholwa yisikhulu seqembu uMervyn Dirks kanti elinye liholwa nguKwazi Mbanjwa owayenguSotswebhu owamiswa noThobani Zuma noSifiso Zuma.
Ukumiswa kwabo kudalwe yizinsolo zokuthi bephule umthethosisekelo weqembu ngokunqaba ukunikezela nge-akhawunti yasebhange yeqembu, ephethe u-R60 million owabelwa isiShayamthetho ukwenza imisebenzi yeqembu. Naphezu kokumiswa kwabo, laba bobathathu basaqhubeka nokudelela isinqumo seqembu.
Umgqugquzeli we-MK Party KwaZulu-Natal, uMnuz Willies Mchunu, usiqinisekisile ukuthi kukhona uqhekeko. Uveze ukuthi iyaqhubeka imizamo yokuxazulula le ngxabano, wengeza ngokuthi likhona ithemba lokuthi kuzoxazululeka. Nokho wenqabile ukunikeza imininingwane ngomsuka wale nkinga, njengoba izingxoxo zisaqhubeka. UDirks noMbanjwa abazange baphendule izicelo zokuphawula.
Uqhekeko seluholele ekutheni kube nokungazinzi kwangaphakathi njengoba amanye amalungu e-MK Party esiShayamthetho abeseka ngasese iziphakamiso zikahulumeni wobumbano lwezifundazwe oholwa yi-IFP, DA ne-ANC. Lo mdonsiswano usudale nokuthi induna uPhumlani Mfeka, owasungula leli qembu ebambe elikhulu iqhaza ekutholeni ukwesekwa, esule esikhundleni. Encwadini yakhe yokwesula ayibhalele uMengameli weqembu uJacob Zuma, uMfeka uzwakalise ukuphoxeka ngesinqumo seqembu, wathi seliphambukile ezimisweni zalo ezibalulekile. Ubalule izinxushunxushu eziqhubekayo kanye “nezigelekeqe” njengezizathu zokushiya kwakhe, engafuni ukuzihlanganisa nesimo esikhona kuleli qembu.